【移民日本】留日港人分享 日本打工轉永居有幾難?邊類人勝算較大?

·4 分鐘文章
留日港人分享 日本打工轉永居有幾難?邊類人勝算較大?
去日本打工,要有心理準備扣稅後,人工有機會低香港一截。

日本放風計劃積極吸納香港人才,咁去日本打工係咪咁理想?今次由在日本打工五年嘅Peggy分享,用工作簽證轉永居有幾難?去日本打工有乜伏位要留心。

工作假期要回港「過冷河」

Peggy當初係申請工作假期先登陸日本,並選擇她最喜歡嘅京都作為落腳點。

成功申請工作假期簽證後,Peggy選擇到京都一間民宿打工。揀民宿既貪包住宿,亦可以親身體驗日本旅館工作環境同規矩。她坦言當初到日本時日語程度只有N3,一般問路還可以,要在當地工作就有點吃力。於是在民宿打工之餘,亦到當地日語學校再進修並考上N4程度。

Peggy表示除了民宿,選擇關西落腳到和服租賃店、餐飲業等面向遊客行業,都較容易取得打散工機會。由於她在香港從事教育工作,後來在當地人事顧問介紹下獲得一間教育機構聘用,並成功申請工作簽證(就勞簽證)正式開始在日本打工生涯。

留日港人分享 日本打工轉永居有幾難?邊類人勝算較大?
新制度下工作簽證到期後須返香港「過冷河」,不過返港前仍可以把握機會面試及參與實習,為日後搵新工申請就勞簽證舖路。

不過Peggy提醒大家,工作假期無縫交接到工作簽證已行不通,皆因現時規定工作假期簽證到期後就必須離開日本,換言之想在日本繼續打工仍要先返香港「過冷河」幾個月,再重新搵日本工作機會。成功獲聘再由當地企業代為申請「在留資格認定證明書」,再憑證明書到日本簽證中心申請「技術.人文知識.國際業務」簽證才可以再到日本打工。

登陸要趁早

雖然要過冷河,不過Peggy認為仍值得趁年輕申請工作假期簽證。除了可以累積當地實際打工經驗,另一好處係令自己更早起步到當地打工。Peggy坦言像她大學畢業後打工五、六年才到日本打工,在當地重新賺1.5萬港元月薪,扣2起年金、入息稅及保險費變相七折出糧,人工較之前香港份工差一大截。所以剛畢業就登陸日本,就沒有這種變相減薪「痛點」,心理上更容易投入當地工作。

留日港人分享 日本打工轉永居有幾難?邊類人勝算較大?
Peggy表示唔少工種都只能獲批一年工作簽證,每年續簽都有一定心理壓力。

到日本打工另一心理關口係轉永居要捱十年,Peggy表示她從事教育工作只算係「低端工種」,無法參與高度人才計劃,亦只可以續簽一年簽證,每年要申請續簽,望著十年終點其實很遙遠。雖然連續居留五年可申請入籍,但Peggy表示申請失敗日後再申請獲批機會就細得多,在唔打無把握仗前提下,都唔太建議衝動申請。

問到點先可以提高日本打工轉永居勝算,Peggy笑言她唔少朋友係先打工、後嫁人入籍日本。唔想用此途徑,最有優勢係讀醫護、資訊科技同機械工程出身人士,皆因這三類工種都相當渴市並較容易覓得高薪工作機會。本身資歷較吃香人士,她亦建議可以先嘗試搵日本外資公司工作機會,皆知外資工作環境無日資企業有大量規矩同潛規則,適應上亦較容易。

Peggy亦提醒有意到日本打工新手,要留心選擇落腳城市及稅務。她表示除非對農業有濃厚興趣,否則就要選擇一線大城市。講最多機會東京仍是首選,她就認識一名翻譯高手在東京打工兩年後認識了一批企業客戶,之後自立門戶開一人翻譯公司做老闆。但東京亦因為匯聚全國勁人,競爭相當激烈。另外大阪亦有較多元化工作選擇,修讀貿易或機械工程相關學科,則可考慮貿易及製造業發達的名古屋。Peggy亦建議初哥可以考慮落戶福岡,當地企業文化較「親和」,而且匯聚唔少初創企業,這背景對外地人搵工都較有利。

至於稅務,Peggy提醒不少企業是以「外派員工」方式聘用外地人,即員工係受僱於派遣公司。她建議下載為外國人編寫嘅勞動基準法解說,方便日後比對公司合約條款是否合理合法。另外有部分企業會認為幫「外派員工」扣稅係派遣公司責任,所以未有核實相關員工每月有否扣稅,而派遣公司亦唔一定會認真跟進,她自己就試過做滿一年才知道完全無交稅,結果要花唔少時間向稅局解釋及處理補稅事宜,所以日本打工新手最好睇睇每月有否扣稅,避免因為漏稅令工作簽證續簽失敗。

伸延閱讀:

【移民加拿大】加拿大放寬港人移民政策 邊類人最受惠?

【打工移民】啟動海外Workation發掘移民機會

【移民日本】港人移居日本入門教學(創業篇)

【移民日本】港人移居日本入門教學(打工篇)