異動尋寶│燃氣電力股 弱市顯威力(魏力)

·2 分鐘文章
燃氣電力股 弱市顯威力
燃氣及電力股近期都表現硬淨,前者屬潔淨能源,增長雖不及科技醫藥股,但勝在夠穩定。

港股托內銀友邦(1299)再狂掟科技股,所謂市傳美團(3690)遭主要股東批股,又或者科網巨企被勒令1個月內整改,都是藉口而已,大戶不斷將倉位由增長股搬去價值股,繼續炒經濟復甦主題,2月以來其實無變過。睇明大方向,就知要暫時遠離夢想股,有盈利有數計夠平的股票,那怕係幾悶死咗幾多年,資金都繼續泊入去,成為圍爐避險之地。

下載Yahoo財經APP

美股、外匯、加密貨幣免費即時報價,自選投資組合獲取相關新聞提示。

中燃搞氫能利托估值

舉例來講,燃氣及電力股近期都表現硬淨,前者屬潔淨能源,增長雖不及科技醫藥股,但勝在夠穩定,市盈率亦不算離地,個別更新增氫能源故事,例如中國燃氣(384),剛公佈與中海油集團子公司合作搞加氣站及儲存設備,應可幫助托住個估值。股價上日漲半成破頂,創52週新高。

睇番周線圖,中燃自2018年開始,一直於22至35元區間上落,行了一個巨大W形,有條件整固完成向上展開新升浪,此股雖然難炒,但小注揸中線未嘗不可。

至於中資電力股,向來老餅兼低增長,升跌都係睇煤價做人,電價仲要受阿爺高度控制,缺點多到數唔晒。不過佢哋勝在夠平又息高,普遍都6厘起跳,成為不錯的避險選擇。近年仲大力提升新能源如光伏風電的裝機量,與時並進,當中華潤電力(836)新能源發力收入佔比已超過4成,以增長步伐估計,今年隨時過半,呢個係估值收復的一個契機,同樣地,博呢個催化劑要中線持有,不能操之過急。

魏力

筆者為證監會持牌人,持有中國燃氣財務權益。

www.facebook.com/2012jason

www.instagram.com/ngailik.stocks/

本欄逢周三刊出