【異動尋寶】三個散戶最想知的問題(魏力)
肺炎斬倉潮過後,環球股市近日顯著反彈,買得貨未?悲觀者睇大蕭條、滯脹、通縮;樂觀者就睇見底,無限QE可再催生牛市,誰是誰非?一定要事後才有結論,但基本可以肯定:一、無人知疫情幾時結束、甚至受控;二、多國封城停市令供應鏈斷裂,幾時恢復亦無從估計;三、停工停產下,企業資金鏈危危乎,千萬家庭生計不保,最終有幾多企業、個人失救破產?同樣難以預測。疫情每持續一日,爆鑊的機會又多一分,市場充滿不明朗因素下,試問目前堅定buy and hold的投資者又有幾多?
受累疫情 短炒難大注
魏力近日親身落場的經驗係,由於對疫情受控、股市見底的信心不足,出手一來謹慎、縮注,二來多是炒短線,搞完一大輪後最多是微利,唔夠買驚風散。明知「不賭是贏錢」,但又要保持市感,只能雞仔注參與,坦白講是有點浪費時間,唯有希望疫情快過,等局勢明朗化再出手。
近日粉絲問題主要是三個:一、想博油價反彈,買乜好?二、低吸收息股有乜選擇?三、物管、醫藥股強勢可否追入?在此統一回覆。
一、油價40蚊短時間劈落20蚊,平過礦泉水,點都會反彈卦?理論上係。沙特本身開採成本低至10美元一桶,才能以價格戰「以本傷人」搶市佔率,因此油價跌至10幾蚊桶相信已是底線。昨日美俄協商油價問題,已刺激油價急彈半成,短線似乎仍是博彈較有值博率。
二、長期低息環境下,穩定派息的股份確有吸引力,但重點是「穩定」。派息之所以穩定,源於業務增長平穩,而當經濟差到連房託股盈利都可能下滑、煤氣(003)要削減紅股時,真正穩定派息的股份相信只剩下電訊股。
三、物管、醫療設備股可謂強中之強,部份如永升(1995)、春立(1858)等昨日更破頂創新高,但要留意昨日是季結日,基金今季重創過後,為令盤數「靚仔」一點,只好將手上持股mark高,要慎防高追中伏。
魏力
https://www.facebook.com/2012jason/
本欄逢周三刊出