【異動尋寶】用衍生工具睇大市短期頂（魏力）

恒指重熊區27900至27999，有2,283張期指，大戶有非常大誘引推上去殺熊。

憧憬疫情受控，個市繼續挾上，恒指昨日最高27674，只差100點就補哂1月29日的巨型下跌裂口，但尾市都係企唔穩，收市受制50天線，收報27583點，第二次上到黃金比率0.5就回頭，加上成交比上次（2月6日）見27600點時少，只有1,110億元，開始有水尾之感。

從板塊去睇，由騰訊（700）及內銀股帶住上，大部份二三線都跟唔上，表現較標青的只有物管及內房股，前者今年收入、盈利增長最為明確，是基金在波動市下的首選，至於內房，首季賣樓幾可肯定凍過水，咁都有得升，顯然是追落後的技術反彈，水位不會太多。魏力昨日小注買融創（1918），貪佢夠高槓桿，也是內房第一梯隊，反彈點都有份。上方阻力44.5元，各位有跟的戰友睇位操作。

隨時借騰訊挾恒指殺淡友

另外，再從衍生工具分析一下大市走向。指數方面，恒指重熊區27900至27999，有2,283張期指，大戶有非常大誘因推上去殺熊。值得留意，黃金比率0.618位於28016，殺完熊仔、兼且完成反彈目標，兩者非常吻合。

再睇騰訊（700），昨收409元，重熊介乎410至419.8元，涉及1,177張對沖，大戶挾騰訊推恒指，就可一箭雙雕，可見只要中美股市靠穩，沒有突發的負面因素，短期再上殺熊的機會頗高。

反觀近期熱炒的概念：如在線教育、遠程辦公、手遊股等都有回吐跡象，前者估值已炒到離哂大譜（如新東方在線1797），深度調整亦不為過；遠程辦公則仍有機會來第二波，因為內地逐漸復工，勢將引發另一輪感染潮，如大批公司因有同事染病而再停工，市場將再炒home office受惠股。

魏力

筆者為證監會持牌人，持有融創財務權益。

本欄逢周三刊出