【異動尋寶】短線睇實四粒數(魏力)
大戶清哂28000重熊區,食飽飽開始放軟手腳,一跌就是430點,失守10天線,有跟開小弟IG戰友應該記得,呢幾日我不斷強調「值博率」三字,認為恒指低位反彈1,900點後,再上空間不大,皆因疫情確在重創中港以至全球經濟,港股憑甚麼可以上番29000點,亦即是肺炎爆發前的高位?再上最多得幾百點,但近排升得咁急,一回就唔係幾百點咁少了,值博率肯定不是1比1,所以食糊減貨是合理操作。
近排喪炒阿爺放水後,又係時候面對現實,就係成條中國產業鏈已因疫情而斷裂,未來幾個月將會盈警不斷,最保守去睇,上半年業績也會大受影響,中港股市整體估值都會下調,大摩將恒指年底目標價劈至26820點,相當於10.6倍市盈率,其他大行料將跟隨,影響市場氣氛。
短期測市,戰友可留意以下幾粒數:一、人民幣,昨日兌美元忽然再穿7(代表貶值),日線圖破旗而上,凶兆;二、油價,低位反彈乏力,炒中國經濟復蘇又從何說起?三、CBOE VIX恐慌指數,執筆時低位急彈1成,加埋金價炒上,都是市場risk-off的訊號。
魏力
本欄逢周三刊出