疫市奇葩 杯麵模型賣斷市

.

除了電玩，模型都算係今年宅在家另一受惠產業。據聞大牌子模型批發價更可以疫市加價，新推出的杯麵模型仲賣斷市，咁砌完杯麵仲可以砌乜呢？

杯麵同模型此組合贏在「九唔搭八」，加上像真度高，即使一盒模型價錢可以買到N個杯麵，都吸引模型迷搶購。

疫市下此舉竟然是創業藍海，廠商更成功打破產品類型缺口「做大個餅」，添食就勢在必行。最就手當然係繼續與食品品牌搞聯承系列，例如杯麵孖生兄弟盒裝炒麵，造型及內餡都頗具可塑性。另一切合模型迷口味相信係牛丼，與食其家推出招牌青蔥碎牛丼，單係逐粒砌飯面的蔥粒已係一大賣點。「宅」味濃美食又點少得漢堡，與漢堡品牌推出三層漢堡模型，仲可以另購配件，將漢堡變身為雞堡、芝蛋包或魚柳包，同樣可以炒熱話題。

.

美食模型系列更可以擴大到亞洲其他地區，例如與香港快餐集團聯承推出燒味飯系列，一套四款其中一款更只在快餐店幫襯晚市儲印換購，相信有助重振現時快餐店最弱的晚市生意。另外亦可將早前大熱的牛豬解體模型概念套入北京片皮鴨中，一按鴨頭鍵，一塊塊鴨皮就應聲彈出，再加上聲效就更添震撼力。

一但打開缺口，聯乘就可以無限想像，例如杯麵與角落生物，便是最可能大賣的一對組合。

除了美食，跨界模型系列可伸延至不同界別，例如正煩惱如何重振人氣的海洋公園，與其搞Yoga班，倒不如主動出擊找廠商推出聯承模型系列，熊貓固然可以係頭炮，海洋劇場、復刻水上樂園、過山車都係可以用集體固憶作包裝的模型系列，模型迷砌完幾盒海洋公園系列，都可能會興起到海洋公園玩下的念頭。海洋公園如果會出經典系列，大可參考近年大熱的孖寶兄弟LEGO，出完一盒又一盒，最終砌成樂園任玩，大大加強了收集元素。

.

另一捱打行業航空公司，亦可以將模型系列由飛機擴展至飛行體驗接觸到的物件，例如大家都感興趣的派餐車，還有不同級別機艙的座位，當然更不少得一份份的飛機餐，包括最基本的fish或chicken。推出模型系列既可賺些少收入，亦可以燃點玩家對搭飛機的懷念，為日後可以全面重啟客運服務打定底。說到底，疫市下就是要打破常規，誰說只有高達可製模型？如果有日，「譚仔阿姐」都化身模型給食客任砌，可能又會賣斷市了。

===============

精選資訊網站「中環街市」 臉書粉絲頁