百年老店Sears退場 盤點本地百貨「求生力」

美國百年零售商Sears日前申請破產保護令，再次證實Amazon衝擊傳統百貨零售業的威力。港股市場亦不乏百貨股，有興趣扒逆水低吸百貨股的朋友，就要留意百貨股的「求生力」。

香港雖然未有像Amazon般的怪獸級網購平台，但近年百貨股的業績，都反映傳統百貨業務唔多好做。能夠殺出血路主要靠兩招，第一係靠做中、高檔超市，兩大代表有一田及永旺百貨旗下的Aeon，兩大代表都以百貨為牌頭，不過只要到兩大代表的分店目測，大家都會清楚吸金力最強係超市業務。一田百貨一姐早前就透露今年頭兩季超市營業額便勁升30%，至於永旺百貨今年上半年虧損大幅收窄至3660萬元，其中一項改善盈利原因係日本農產品銷量理想。正因為日式超市有得做，連數口精的四叔都出手下注收購Uny本地業務。

第二係收租，最成功例子係經營SOGO的利福國際，今年上半年單是尖沙嘴店，同店銷售便按年大升42.8%。利福能夠谷起本地SOGO業務，絕招之一是把店面分租，變相同時經營零售及收租業務。

按上述兩招，本地兩大老牌百貨股中，較難捱係先施，先施手頭無乜收租物業，最值錢係一堆股票及基金投資，但百貨業務就不斷出血，似乎中、短期內除了靠減價或在各區搞特賣場，暫時無乜良方催谷營業額。至於永安百貨，其實本業成績都一般，不過勝在有上環及海外收租物業幫補收入，明顯「求生力」可以看高一線。

純粹睇投資價值，其實兩隻老牌百貨股吸引力都平平，相比之下，抗逆力較強反而係採用日系百貨超市營運模式的永旺及利福國際，不過後者業績有時會被投資組合虧損影響，七除八扣之下，想在趺市低吸百貨股的朋友，或可以考慮永旺又或同時經營千色店及UNY香港的恆基發展。

===============

財經精選資訊網站「中環街市」 臉書粉絲頁