盤點A股打氣機斤量
A股插水,傳聞有「國家隊」基金瀕臨乾塘,此情況下,唯有靠打氣機出口術撐市,新加入有商品大王羅傑斯,計往績,究竟現時A股打氣機陣營有幾多斤量呢? 最重量級人物當然係國家領導人團隊,副總理劉鶴日前開聲為A股打氣,更指中國正成為最有價值的投資市場。領導人打氣機出動確實催谷了A股,可惜時效甚短。睇怕原因之一係大家對國家隊暴力救市往績有陰影,而且有不少分析指今之跌市其中一大元兇股權質押正是當年暴力救市後當局長期規限大股東減持股份的「產物」,大股東只好抵押股份撲水,為今日大量A股股份押爆倉危機埋下伏筆。 新登場打氣機有商品大王羅傑斯及橋水聯席投資總監Bob Prince。前者揚言已盡沽美股,更已收集A股,原因係睇好一帶一路政策可帶動中國市場發展。羅傑斯盡沽美股其實唔出奇,他一早已唱淡美股,問題係唱淡得太早,如果跟足佢投資,就錯失唔少美國大牛市掘金機會。另一問題係一帶一路大計頻頻受挫消息已不斷傳出,多個國家已就中國投資基建重新講數甚至取消之前的協議,這個時候再拿出一帶一路來講說服力未免有限。
至於橋水,雖然過去曾準確預測金融海嘯來襲,但今次聯席投資總監Bob Prince提出放眼亞洲「東進」策略,明顯是配合橋水成立中國首隻私募基金產品。但 有數據顯示橋水是沽空滙控的主力軍之一。滙控假假地都係重量級港股藍籌,亞洲業務比重又唔細,橋水此舉似乎與「東進」策略有點自相矛盾,不過如果「東進」係包括沽空亞洲市場股份,咁又講得通了。 名牌人物「預言」固然吸引,但我們亦要思考他們出手打氣之動機,再比對一下他們的往績,從而得出「預言」有幾可信。當然如果股神身體力行出手低吸A股及港股,大家信心都會大得多,不過在中美角力敏感時刻,即使股神覺得抵買,都寧願留子彈掃美股吧。
===============
財經精選資訊網站「中環街市」 臉書粉絲頁