【真人真事】見工被問︰「你覺唔覺得自己好反骨?」
乜鬼嘢Google的見工十大刁難問題,通通都已經Out,最近職場的問題真係千變萬化。為咗增加一眾求職者的成功率,小編朋友最近都身先士卒,偷偷地瞞住公司見咗幾份工,同時又同其他有意轉工、近期瘋狂面試的打工仔傾計,得出以下最新鮮滾熱辣的面試題目,當中有唔少問題都幾「啜核」,不如大家一齊諗吓點拆招?
第一位︰「你覺唔覺得自己好反骨?」
呢個絕對係真人真事,非常令人O嘴。轉工原因不外乎想搵更好的工作環境、想要高啲人工、想工時穩定啲等等,呢啲見慣工的打工仔相信都應付自如。之但係如果被問到「你覺唔覺得自己好反骨?」呢?你又會點答?個面試官見見吓工,突然撻着感性Mode咁問,仲要乘勝追擊,「如果我係你老闆,知道你要走,一定好傷心。你會唔會覺得就咁走咗,拋低晒啲工作,會好衰?」殺求職者一個措手不及,當時求職者內心當然反晒白眼,心中只浮起一句︰「人不為己……天誅地滅」。
第二位︰「你唔加人工『平過』,得唔得?」
見工係一件好花心力的事,因為好多時都係見完冇消息,之但係如果公司或HR肯見一見你,相信某程度上都對你有興趣。但一埋位就聽到「我們budget有限,今次加唔到人工俾你,你可唔可以『平過』?」真係立即聽到人爆血管,想大叫一句︰「冇錢就唔好叫人來interview啦,車錢都浪費了。」
第三位︰「你呢一年生唔生仔?」
衰老細心目中,孕婦係辦公室的頭號敵人。試過請人返來做幾個月就話要放產假,又試過坐完月就遞信。可能因為被咁,老闆先會問呢條有機會踩中職場歧視的題目。求職者十居其九都係例牌答︰「暫時冇生仔打算。」然後老闆竟然再搭多句︰「你依家發誓,我就信你。」又係令求職者O晒咀。
對住呢3條題目,有冇打工仔有智慧解答?請留言。
===================
19網輕鬆爆料熱線,歡迎舉報老細同事19惡行,立即click入去講畀我哋知啦