私房菜年賺230萬
【星島日報報道】十多廿年前,香港興起私房菜,多如雨後春筍,每餐叫價多為四至五百。結果,三年後,80%執笠。因為,出得起四至五百一餐,香港80%食肆可幫襯,除非有出色廚功,否則,根本甚少回頭客,人人貪新鮮幫襯一次就拜拜。 汰弱留強之下,仍能企至今時今日者,廚師必定有料到! 若果廚師身懷秘技,打工定自己搞私房菜好呢?打工,到底不是老闆,升到上大廚位,年薪有近百萬,但可能要管幾十人,每日面對千百種內內外外問題,壓力非常巨大。 做私房菜又如何?冇料,當然死。有料呢?分分鐘可舒舒服服年入200多萬! 上周遇上真實個案,一位30多歲天才廚師L,早年在頂級粵菜打工,跟隨一位廚神級人馬K叔,捱足十幾年後,充滿自信,決定與女友拍檔開私房菜。 香港為食鬼無數,只要你廚技出色,唔亂叫價,必定客似雲來。若懂得市場心理,再收平少少兼不收開瓶費,肯定晚晚爆。 「豬哥,我開業已三年,靜靜話你知,每年皆執二百幾萬,遠遠勝過打工!一星期休息一日,每日只做一餐,唔使捱,好快買樓!」 點解阿L咁掂?話說三年前自立門戶時,租下尖沙嘴一間舊商業大廈單位,略作裝修,可擺三圍大 。因出品充滿色香味,尤其海鮮、燉湯及煎炸菜式,極度撚手,加上大件夾抵食,口碑轟傳,五百元一位全包(茶巾介小費,及不收開瓶費)為食鬼蜂擁而至。 投資自己強項有保證 晚晚坐爆30人,一晚收入15000元,一年休息52日,即開工313日,每年生意額470萬。一般食肆食材支出30%,大廚L俾夠35%,令客人覺得抵食。租金方面,三萬一個月,水電煤萬多元。一對情侶合作,每晚只請兩個散工,一個清潔一個樓面,600元搞掂。全部支出,僅約二百多萬,兩口子一年就可淨賺大概230萬! 大廚L做得到,別人未必能,因佢的確廚功出色,按客人需要而定菜式,花款經常變,故熟客頻頻幫襯也不會厭。反之,訂位要排隊兩個月。投資自己強項,永遠最有保證,難怪大廚L談及個人成就,眼中充滿自信。 國策透視/投資王