【移民英國】去英國點搵工 點增加求職勝算?

·4 分鐘文章

移民英國一大考驗係搵工難,想增加勝算,可以從四方面入手打定底及發掘搵工機會。

了解邊一行「缺人」

想知到英國做唔做得返老本行,抑或要學定邊啲技能增加轉行條件,最好先了解一下英國邊類行業「缺人」。到英國政府網頁的「Shortage Occupation List」,就可以查看英國缺乏人手的職業清單。清單中的土木工程師、機電工程師、醫護人員、程式員、商業分析師、平面設計師,香港同類人才到英國搵工應有一定競爭力。但清單上的數學/科學科中學老師、管弦樂手、導演監製,香港人才要力壓當地同行相信有一定難度。

值得一提係廚師及焊接工人都在清單之上,如果有意轉行、自問捱得,不妨先修讀相關課程兼考取專業資格,增加英國搵工競爭力及擴闊搵工範圍。

善用搵工平台

搵工平台係發掘工作機會重要入門途徑,英國網上搵工平台發展相當成熟,綜合型有IndeedReedMonsterTotaljobs等。從事熱門專門工作又想搵返老本行,不妨善用專業型搵工平台,例如專注I.T.及科技範疇工作的CWJobs,又或網羅金融行業空缺的efinancialcareers

你可能已有心理準備要用半年至一年搵心儀工作,期間就邊做兼職邊搵工。想搵兼職工的話可留意JobTodayRota,前者涵蓋較多元化的工種,後者就較多餐飲類兼職或散工。當然亦可以同步留意UberEats、Deliveroo等送餐巨頭的外賣工作機會。

另一重要途徑係被動式配對搵工平台,例如為I.T.人而設的HIRED,建立個人資料頁後系統就會作出空缺配對。英國企業亦會透過Linkedin搵人才,在Linkedin設定個人頁面,上載專業見工相,詳列工作經驗、專業證書,找前同事、上司留下推薦評語,再主動出擊加入當地相關行業群組,都有助發掘更多工作機會。

擴闊搵工網絡

唔少打緊外國公司工的朋友,當初都可能係經中介公司搵到呢份工。英國亦有類似情況,搵工平台有唔少大機構的空缺都係由中介公司發放,英國中介公司不乏香港人熟悉的名字如Manpower、Randstad、Michael Page等。與香港一樣,中介公司都可能會邀請你上去作初步面試方便日後作更多工作配對。

想搵入門級工作亦可以留意兩類搵工網絡,一是英國政府的Jobcentre Plus,與香港勞工處一樣設有地區搵工中心及網站,除了政府工作,亦會提供唔少入門級工種。二是由地區組織策劃的招聘會,要知道幾時有這類招聘會,最好先加入自己居住的地區群組或居英港人群組方便「收風」。

學習微管理

英國人出名重視程序及微管理,所以要增加搵工勝算,都要大幅提升自己的微管理本事。基礎一步係重整自己的CV,除了到英國的搵工平台認真參考英式CV格式,亦要詳細列出自己的工作技能及個人特質,皆因英國的僱主很著重留意求職者技能及個人特質是否與機構及空缺要求相符。

另外英國公司很著重背景審查,即使CV上列出一份只做了短時間的工,負責背景審查的員工亦可能要求該公司聯絡方法方便審查。所以在CV列出的工作經驗,最好有工作證明及有效的聯絡方法,否則就不如刪掉,原則同你搵政府工大同小異。

至於英國搵工係咪搵食超難,參考英國政府統計數字,英國專業工種人工確實跑輸香港,再加埋稅項就更少一截。但要留意英國近期失業率只有3.9%更勝香港,而且不少過來人都表示只要捱過第一個月的艱難期,搵工通常可見曙光,亦有人在一年後成功重投香港本行,當然前提係要有Reboot人生心態,唔怕辛苦亦唔怕嘗試新工種才可以在英國職場求生。

伸延閱讀:

【移民外國】移民離港理財教學(清稅強積金篇)

【移民英國】去英國打工生活 究竟要交幾多種稅?(生活篇)

【移民英國】去英國打工生活 究竟要交幾多種稅?(收入篇)

【移民英國】BNO移居英國開綠燈 點樣儲英國資產?

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能