雅虎香港財經 【移民英國】英國速成電單車+買二手車教學
登陸英國其中一項煩惱係搵車代步，除了買二手車，只要有車牌，上完一日堂你仲可以揀買電單車代步。
速成電單車賺外快
假如你住大城市擔心養車貴，又唔想搭巴士地鐵踩單車，其實仲可以考慮買電單車。只要用香港車牌轉換有效英國車牌，再用一日時間上堂，就可以在英國揸電車單代步。
只要持有UK Full Driving Licence，就可以去當地駕駛學校報讀Compulsory Basic Training (CBT)課程，課程大約需時八小時（即係預上一日堂）。學校通常會租用頭盔、手套服務，不過對服飾有一定要求，唔達標就無得上堂，所以上課前最好先了解服飾要求。完成課程Pass取得證書，就可以按條件揸電單車代步。
CBT算係濃縮版電單車入門課程，學費由£89-£100不等，課程分為A至E五個單元，A係簡介全日課程及視力測試、B係on-site training，講解電單車基本操控知識、C係on-site riding即場內試駕練習、D係on-road training即出馬路前訓練，講解路上駕駛技巧及安全須知、E係on-road riding即在馬路實地駕駛，掌握馬路實地操控技巧及安全知識）。一日速成聽落好兒戲，不過在香港學過電單車都知，頭兩堂已明顯睇到邊位學員有天份操控電單車，所以你通過到五個單元，再跟車友在較寧靜路段操車很快就可以上手。
成功完成5個單元可獲發DL196 CBT證書，憑證書就可以按簡單條件揸電單車，條件包括唔超過125CC、不可載客、不能上高速公路、車身須掛上「L牌」、證書有效期兩年續期須再上CBT課程。
揸電單車好處係成本平，到Autotrader搵二手車盤綿羊仔唔少1000以下有交易。輕巧綿羊除了方便在大城市繁忙路段穿梭賺時間，另一優勢係可以兼職送外賣賺外快。當地熱門外賣平台如Deliveroo，電單車手都係掛個「L牌」揸車開工，現時車手時薪約£10，都不失為賺外快好選擇，特別係尚未搵到穩定正職的時候。
買二手車入手渠道
電單車無疑較適合在大城市代步，假如你住在鄉郊就應該考慮買私家車。部署登陸英國時，唔少人會考慮運架車到英國，但運費起碼兩萬港元且一般需時兩個月，為免麻煩都係先賣車套現較實際。
唔運車到英國就要考慮買車，初到埗慳慳地最好選擇買二手車。購買二手車渠道分三種，一是在網上平台如Autotrader搵二手車盤，二是直接在車企或代理買獲認證易手車（Approved Used Car）(如英國豐田的易手車服務），三是在大型車行搵二手車。
情況一如香港，網上平台車盤會較平，但部分特別平車盤可能會涉及保險公司Write Off的問題，平台會按分類列出車盤的嚴重問題（見附表），當然你亦可以先剔走涉名這些問題類別的車盤。你亦可以透過平台的紀錄查閱或購買Hire Purchase Investigation (HPI Report)，為睇中的私家車起底，了解該車過去曾否涉及嚴重意外或被偷。
求穩陣就寧願貴少少買認證易手車或到大型車行搵二手車盤，好處係車行可幫你安排驗車MOT Test（三年以上車須強制驗車，收費上限為£54.85），跟車文件會較齊備，特別係出車必備的汽車登記紙 (V5C)，提供地址予車企、代理或車行代為登記，轉名後的V5C文件就會郵寄到你地址。
另外不可少開支係牌費（Road Tax），於2017年4月1日後登記油渣/汽油私家車牌費為每年£150，電動車可獲寬免。另外排氣量不超過100g/km，於2001年3月至2017年3月31日登記車輛亦可獲寬免，所以有英國專家教路想慳牌費就專揀低過此排氣量標準及符合車齡要求的小型汽車。
至於車保，分第三者保險（Third Party）、第三者＋被燒被偷保險（Third, fire and theft）及全保。保費係按車主年齡、牌齡、車齡車款、住址地區、估計每年駕駛距離、泊車地點及用途計算，剛到埗英國港人由於無得計NCB (No Claim Bonus) 無可避免要支付較高保費，一般至少要£1000，想慳唯有只買第三者保險及加大少少墊底費。
牌費可以到英國政府網頁支付，至於車保亦可以在先在保費比較平台格價及購買，較受歡迎有Confused及Gocompare。
伸延閱讀：
