雅虎香港財經 笑到最後｜三招救恒指 今年可見三萬點（高明）
港股星期一下跌過千點，基數低萬五、六點水平再千跌收場，令人可惜。同日宿敵新加坡股市假期休市，無起跌對比千跌，又再一次畀新加坡瞓低贏，實在令港股支持者捶胸頓足。有見及此，本欄必須發放正能量，提出有建設性嘅建議，以拯救港股。
美股外幣即時報價 多國新聞任睇
一、不派機票改派股票
早前有報導指，一旦香港取消全部入境防疫限制措施，明年將贈送價值20億元的50萬張機票，以吸引海外旅客。
所謂遠水不能救近火，全面通關未來，恒指關關向下通，不如先救股市，撥出派機票嘅十倍價預算，例如200億港元，以拯救股市。當然，港股市況低迷每日成交數百億，今個星期旺場一樣有過千億，兩百億元價值嘅股票幫唔到啲乜，但派股先決條件就係開港股戶口，假設每名投資者派5萬元股票，港股市場突然增加40萬名股民。情況有如澳門賭業開初買船飛送泥碼一樣，開賭唔怕輸錢，最怕冇人嚟玩。
二、回購及0+3
美股最吸引之處，在於企業持續回購，美股回購總額不斷增加係近三十年發生嘅事，教科書原意係派息要交稅，回購谷高股價當派咗息免稅（最新通賬減少法案加入1%回購稅，2023年1月1日開始），統計指出，宣佈回購後平均股價上升3.5%，期後持續跑贏冇回購嘅同業12%。
現時香港立法程序簡便，大可立法鼓勵上市公司進行回購，以及加強大股東買入股份嘅誘因。雖然港股及美股文化不同，但港股股民都樂見上市公司及其主席自行洗濕個頭買股，如果立法規定上市公司董事可以喺薪酬嘅一半以股票出糧，要舊股，由上市公司買入作支付薪酬，不得發新股或期權支付，並且設禁售期為離職後3年（0+3）方可沽貨，大大增加投資者買入港股信心。上市公司高層享受以股代現金出糧，長期持有必升，亦等同「逼佢發達」。試諗吓2004年騰訊（700)逼佢員工收股票當份糧，廿年後會點？
三、額外印花稅SSD涵蓋港股
你冇睇錯，額外印花稅伸延至港股。因為自從 2010 年 11 月 20 日港樓有SSD後，樓價升幅以倍升，主要原因係SSD係買入後6個月至3年內沽出有20%至10%額外印花稅，變相等同減低香港樓市供應，挾高樓價。
同一時空香港股市自出自入，冇SSD保護，變成外資提款機，環球不穩最先沽港股。只要設立額外印花稅，從而有廣泛嘅禁售期，從而達到減低股票供應嘅目標，股價挾升只係時間問題。
另外，賺到嘅額外印花稅亦可以支援第一項派股票畀冇港股戶口嘅任何人，隨後正名為「持續派股基金」，不斷增加香港股民基數。
簡單經濟學理論，供應減少需求上升，小學生都識，三招一齊做、即刻做，港股今年就會重上三萬點。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
