笑到最後｜人類炒股點樣贏AI？（高明）

機構投資者、AI程式炒股已經主導咗所有市場，但一個普通人類仍然有可能贏錢。 (Westend61 via Getty Images)

星期一上利世民頻道同Calvin講似乎係二元對立嘅Buy and Hold爭議，如果有興趣就上網睇返，引伸出嘅另一個話題就係市價係咪有效，即係大家讀金融ABC會學嘅有效市場假說（Efficiency Market Hypothesis)， 就係有咩好消息都已經在現價反映晒，投資者都知道晒，所以未來可以賺錢嘅機會甚低。由於當日節目唔係講呢樣，冇點深入，所以抽今日再講。

下載Yahoo財經APP

美股外幣即時報價 多國新聞任睇

具體咁講，點解價格大部份時間都冇效，未能反映價值，其實每次業績都會出現相同戲碼：雖然有啲業績市場一早已經預測晒，公佈前後公司嘅價值又冇大變，如果市場係有效，業績公佈理應行禮如儀，股價冇乜點變，但每次業績總係股價轉勢嘅契機。

呢個現象可以有兩個解讀：一、市場對於每間企業嘅未來知道嘅好少，其實佢哋都係公布之後先知；二、就算知道，都係大打穩陣播，等佢公布晒先至買，唔打天才波。

誘因不一致 價值見偏差

前者唔係太難理解，股票市場係價值同價格互相尋找嘅過程，大家琅琅上口嘅內含價值，都係由價格去尋找。股市有冇咁理想，完全反映並折現哂所有價值呢？我認為冇，因為價值係主觀，你覺得電動車好正，豐田章男未必同意；你覺得Google（GOOGL）好正，可能又會有人覺得ChatGPT 先至係未來。大家要明白，喺未揭曉個答案之前，價值係主觀，亦係大家所講，投資嘅藝術成份多過科學成份。大家睇到嘅價值唔同，買賣決定自然有偏差。

第二個解讀，首先，今時今日資金有成本，唔買A可以買B，或者維持美元狀態亦有息收，冇凌駕性原因，真係唔一定要郁。

更重要原因，整個金融市場主導嘅人，都係讀書叻一路考上去，然後加入大行打工，最後變成基金、保險、銀行、證券相等唔同範疇嘅中流砥柱，雖然都有人係自立門戶，但係大體上金融行業打工仔係主流，由自己炒自己錢100%盈利，到全職得份底薪0%投資盈利，中間有好大嘅空間，令到大家誘因不一致，影響咗決定，即使係99%知答案，如果份糧係100%主要誘因，點解唔等埋揭曉先決定？穩陣咁輸客啲錢，好過醒目地被炒魷魚。

解決咗呢個迷思之後，應該更加要相信價值，然後搵一個其他人唔明嘅時空入市，呢個就係整個「低買高賣」嘅架構來源。點解機構投資者、AI程式炒股已經主導咗所有市場，但係一個普通人類仍然有可能贏錢？誘因嘅唔一致，令到睇到嘅價值有偏差，可能就係現代人類仍然可以贏電腦嘅少數取勝方法。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出