笑到最後｜教你如何Zoom剪頭髮？（高明）

現時剪頭髮嘅生意模式，大概同100年前分別唔大。 (Deagreez via Getty Images)

早排同朋友吹水，現時科技嘅發展已經快到，大部份嘅軟件應用，根本唔使自己寫，當你有需要時，上網Search，一定會有類似嘅功能，Code嘅意義只係將佢哋連埋同埋除Bug。咁小朋友使唔使學寫Code？因為現時已經發展緊零Code，到小朋友大個，到時一係已經唔使寫，一係要英超級數先有搵食能力，所以都係隨緣，佢哋鍾意就學，唔鍾意就罷，反正大部份功能已可租，10.99美金之類一個月。

下載Yahoo財經APP

美股、外匯、加密貨幣免費即時報價，自選投資組合獲取相關新聞提示。

吹完水唔使幾耐，香港就收緊社交距離，市民第一個反應，就係撲出去剪頭髮。呢個行動，對於之前講而家科技發展好勁嘅對話，都幾諷刺，因為現時剪頭髮嘅生意模式，大概同100年前分別唔大，你去彌敦道9號剪個湯碗頭，同去銅鑼灣Salon洗剪吹，模式都係冇變過。喺2020年疫情過後，好多業務都已經數碼化，零售變成網購已經好基本，飲食變咗外賣亦都唔意外，另有大量辦工室電腦工作，現時發現除咗老細要求外，實際工作係唔使喺辦公室，個Server駁到就得。

好大部份嘅工作，根本唔使再見人。例如醫療，一般門診傷風咳睇醫生為配藥嗰啲，Zoom（ZM）做已經可以，上網約個時間，反正都係問診5分鐘，血壓心跳氣管嗰啲，總有工具可以傳送去另一邊，然後送藥上門，節省雙方大量等候時間。當然，大家住過香港一段時間，就知道醫生問題牽涉到牌照，比較複雜，冇咁容易遙距化，對佢哋嚟講亦都冇乜必要，係病人等啫。

但係剪頭髮唔使牌照，疫情都幾影響生意，應該一早可以遙距。早喺2013年，Wired已經有一篇文章講虛擬剪頭髮，不過係逆向，一部叫Little Printer嘅儀器，每日印唔同嘅新聞及提示（2014年已停Server，2019年被收購用嚟連接RSS），當年每印一次，就會出現一個笑樣，由情人節開始，頭髮就會生長，用家要決定剪定繼續留長。當年嘅意念同虛擬剪自己個頭爭好遠，但就係將剪頭髮連接上網嘅早期階段。

機械手成本最關鍵

現時已有AR、VR，再加早前炒爆嘅元宇宙，只係爭一個實際應用到嘅工具，例如一雙機械手，就可以遙距剪頭髮。一個身處巴黎最優質Salon嘅髮型師，可以幫全世界任何地方出得起錢嘅人喺元宇宙剪髮。至於求其冇要求嘅日式快剪，則可以用程式剪。所以返番去第一段，未來世界技術喺中間模棱兩可，將會比較難搵食。

現時嘅障礙係一雙機械手價錢太貴，最新亞馬遜（AMZN）創辦人Jeff Bezos喺亞馬遜機械人展覽到示範一雙機械手，睇動作非常靈巧，估計會利用喺亞馬遜業務甚至乎上太空嘅藍色起源Blue Origin上邊。有錢人嘅玩意當然同普通人思考角度唔同，佢諗上太空，我哋諗喺屋企剪到髮已經好感恩，配合AR技術，基本上在家剪頭髮嘅技術已經可以做到。現時係成本問題：租用對手，送去屋企然後自己走，如果太貴重亦有被偷或整爛風險；香港城市結構，如果嗰對手要上門，恐怕要識自己㩒𨋢，提升嘅技術同本業無關。搵物流來回運成本太高，亦唔太合邏輯，本來去人化，結果用多咗搬運工人。嗰一雙巧手一日未平到好似廚師機咁人人家庭都有一對，就好難在家剪髮。

不過呢一日都唔會太遠，忽法奇想，另一個行業一直在家工作，但冇受惠WFH潮，就係家庭傭工，如果一對機械手下面加個圓形吸塵機咁識郁嘅功能，到時遙距操作，家務助理都可以WFH，當然到時亦有可能程式已經做到。

股市現時好似唔上唔落咁，但係未來仍然有好多價值可以畀科技公司破壞，簡單如剪頭髮都未發展過，絕對有機會產生delivercut或Lionbarber。現實搵食嘅困難，仍然係科技股價大升嘅主要源動力。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出