笑到最後｜深層政府、滯脹及我好鍾意返工（高明）

留意滯脹定義，係經濟差失業高同時有通脹。 (Vladimir Zakharov via Getty Images)

滯脹就係不斷印鈔無效，一方面出現高通脹，另一方面經濟增長持續低迷。近期美股吹淡風其中一個方向係經濟衰退，但油價、電費、食物、租金等不同形式嘅生活開支上升，明顯係滯脹，多於純粹衰退。

下載Yahoo財經APP

美股、外匯、加密貨幣免費即時報價，自選投資組合獲取相關新聞提示。

如果從深層政府陰謀而言，滯脹係Deep State最美好嘅時光。滯脹前經歷一個大牛市令一般草民一度紙上發達，辭職唔撈全職做「狗狗幣投資者」。及後貨幣供應增長無助經濟，股市回落，失業上升，投資者要做返麥當勞（MCD），配合各方傳媒、親友、大環境營造「馬死落地行」氣氛，即係打工仔唔敢要求加人工，令到資本家成本下降，但產品價格上升。

留意滯脹定義，係經濟差失業高同時有通脹。以前讀經濟有意無意引渡你覺得「通脹係壞事」、「通脹只係nominal名義上，冇人着數咗」，實際上如果你嗰行嘅人工售價出現通脹，你係等於加薪及更多機會。就算其他物價一齊升，拎住被經濟學者認為「inflated money」，一張機票，曼谷布吉巴提雅，已經解決原居地物價上升問題。更何況有能力全球生產尋找低成本嘅企業。

滯脹屬少數人諾亞方舟

所以以前經濟學睇嘢太闊太宏觀，實際上，滯脹就係少數人嘅諾亞方舟：處於通脹嘅一方，就會話「經濟差？唔覺喎」；處於失業率高嘅一方，就會話「百物騰貴冇前景」。

如果有Deep State深層政府，對於滯脹係樂見其成。因為辛苦嘅係大眾，加價嘅係佢。「加價成本都貴咗冇賺多到」，信不信就由你，因為香港進口Van仔都成日聽，日圓升值所以加價，最近日圓貶值，主流客貨車進口唔知有冇減價呢？

特別係滯脹成因嘅重要一環，係增加貨幣供應、寬鬆貨幣政策，完全係由政府一手主導。如果失業高企又冇增加貨幣供應，經濟差同好差，對一貧如洗嘅人，唔會有額外災難。偏偏溝淡貨幣價值，本來搵唔到食，餘下嘅積蓄又以溝淡形式被打劫，為兩餐局住賤物鬥窮人，用低薪幫人打不斷加價嘅企業工。可以話，經濟衰退係一鑊熟（有另外三隻廣東話字更加貼切，但不便使用），滯脹係人食人，經濟差仲可以加價，當中嘅價值去咗邊，其實又係另一種形式嘅財富轉移。

至於點解不論係投資名人、經濟學家，定財經老師，都話唔到畀你知滯脹可以點保護資產，因為大部份人都處於被剝削階級嗰邊，即使你明知部份商品價格會升，例如石油、食品、原材料，大部份人無法一下子變身做有關供應商，打份工則要同失業高企嘅其他人競爭低薪（至於買股票則另文再談）。少部份人當然可以姿色改變命運，例如嫁個油商老闆，絕大部份人則只可以係work-to-earn捱過呢段時間再算，可以話，過去幾十年香港人「我好鍾意返工」捱過咗好多跌浪。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出