截稿前恒指又跌，嗰一千幾百點嘅跌幅，可能大家都見慣見熟。但重點並唔係守唔守到兩萬點，而係破頂未？全世界所有主要指數，今年點都升上疫情後高位，唔破頂仲專登走去尋底，就係有問題。
美股外幣即時報價 多國新聞任睇
港股夢幻價已成美股常態
道指已經四萬四點，港股嘅四萬點夢幻價，喺道指已經係常態並準備再超越。納指今年再上萬九點，點數上又再次同恒指會合。
幾年前，如果有人同你講bitcoin會上10萬美元，你會覺得係scam，大選後亦已接近九萬九，冇乜咁不可思疑。
最能反映東升西降嘅日股，今浪領導全球，年初已上四萬點，升幅早過晒其他主要指數，7月高位42426點，之後雖然波幅比較大，但仍然係高位徘徊。主要因為日圓貶值推動出口企業盈利，同一陣半導體熱。
個別板塊未能全面復甦
人間地獄英國嘅富時指數，5月亦創歷史新高8474點。論客觀原因，英國經濟復甦緩慢，脫歐後經濟政策不明朗，此外英國指數成份股科技比重落後德法，亦比唔上香港，5月升幅係升英鎊滙率，而能源股和礦業股支撐，但整體經濟結構增長有限。連國內最有AI科技浪嘅公司ARM都去美國上市。咁弱嘅股市，龜兔賽跑之下都破到頂。
相比以上指數，香港恒生指數疫情期間2021年再上31183點，之後未接近過，10月初短暫爆升，好多人話「牛一」，宏觀睇國際大局，突破唔到31183點前，都好難稱為牛市。
未能突破前高位。原因可能包括：港股依賴金融、地產同科技股，而這些板塊未能全面復甦。相比美股、歐洲股市吸引環球資金，港股受內地政策風險拖累，外資投資意欲下降。中國加強對科技企業的監管直接影響港股科技權重股等。
不過當你拍埋英股一睇，後者一大堆老化石，竟然都破到頂，港股嘅企業更有活力，但股價向下活，就知歸根究底，跌嘅原因只係冇人買。點解冇人買？就真係單眼佬都未必知。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
