笑到最後｜港股走勢跑先港樓十年（高明）

港樓嘅中原城市領先指數顯示，疫情至今，仍然未破19年同18年嘅頂。 (ANTHONY WALLACE via Getty Images)

港股再次顯現Legendary mode嘅特性，官媒《經濟參考報》刊文警示遊戲對未成年人危害，形容為「精神鴉片」、「電子毒品」，點名騰訊（700），應及早合理規範。騰訊股價一度跌近9%，至中午時該官網及訂閱號已經下架，惟電子版稿件未下，股價隨即跌勢放緩，收市下跌6.1%。

下載Yahoo財經APP

美股、外匯、加密貨幣免費即時報價，自選投資組合獲取相關新聞提示。

喺美股三大指數再創新高嘅時候，恒指一度跌超過兩千點，恒生科技股指數就更加唔好提。跌低，係冇所謂，正如好多勵志說話所講嘅一樣，起得返身先重要。可惜港股跌完，反彈時間同力度都有限，即係話股民除咗高沽低買再高沽會賺錢之外，其他情況好難贏錢。

大家可能會話，買股唔係一定要低買高沽咩？其實唔一定，詳情可以問吓買咗TQQQ或VOO嘅朋友，好肯定好多人第一次入場都係當時摸頂入（多人講吖嘛），之後就再創新高咁啫。

隨住港股越來越難炒，網上世界就有兩種意見，一種好似本欄咁叫人炒美股；另一種就係話資金會流入港樓，叫人買樓。

至於標題：咩叫港股走勢跑先港樓十年？意思即係港樓將會步入港股橫行格局，跌唔死，升亦唔多。

領先指標就係全球樓價指數，本地精英至愛嘅英美澳加紐樓價，全部最遲喺舊年10月已經破晒頂，嗰時仲未有乜移民潮同埋封晒關，升幅來源就肯定係當地人。

但係港樓嘅中原城市領先指數顯示，疫情至今，仍然未破19年同18年嘅頂，如果睇差餉物業估價署數字，細單位、新界樓已破頂，港島、大單位則仍然低過高位，即係呢個唔係一個整體升市。

中國熱錢主導樓市

過去十年港股講得最多係「A股化」，表面特徵係政策市、指數長期橫行、一爆就狂升、彈完就散。深層次係人，參與嘅人唔同咗，影響咗價格。

港股因為自出自入，港人從未試過有主場之利，中國熱錢湧入後亦跟咗A股炒法。港樓就因為自住流通較低，本來仲有少少主場之利，但係十年來出出入入，中國熱錢亦都已經主導樓市。港樓跟隨港股走勢，亦只係時間問題。

大家可能問，咁升定跌？因為聯儲局喺過去年零印銀紙多咗一倍，樓價一定係升，但係相對貨幣增長，樓價就跑輸緊，高明亦預言未來十年樓價會跑輸貨幣增長。

港樓問題只係，升幅肯定冇其他地方嘅樓市咁多，更加無可能同美股比。同港股比，港樓或者係比較好嘅橫行。

當然，如果港樓嘅comfort zone好舒服，其實冇必要轉，情況有如十幾年前大把人覺得盈富基金（2800）3厘息好正一樣。自在就好，無必要理會其他人講乜。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出