笑到最後｜納指又到破頂時，深呼吸（高明）

今次納指破頂後只會升得更多已成定局。 (Alan Schein Photography via Getty Images)

納指啱啱突破一年高位，從歷史嘅角度，每次破頂之後股價只會更高，否則今日應該係1300點，而唔係突破13000點。指數嘅作用比起過去任何一刻都要重要，好似今年美股打開熱力圖，其實只係升最大嘅十隻八隻股份，就算放諸於港股，由於中美嘅科技水平距離拉闊，除咗恒指入邊最大嗰幾隻之外，其他已經同世界潮流脫軌，入唔到指數嘅更加好難追番。

下載Yahoo財經APP

美股外幣即時報價 多國新聞任睇

當然股票唔一定純粹跟潮流，但係近兩年科技發展速度之快，好似今年AI發展，就算係AI本身都好容易因為有其他新嘅產品出現，令到稍為舊一個版本變得落後。AI暫時最直接嘅應用就係炒人，節省勞動成本，呢招亦都係香港企業最成功嘅「鏈數」、控制成本，如果自己嘅殺手鐧，因為美國出現新科技，令到其他人做得更好，非指數嘅股份可以話已經欠缺投資價值，投機價值則另作別論。

全靠AI突圍

又或者咁講，十年前美股科技股發大達，科企老闆開始玩富豪玩具，投資虛無縹緲嘅Next Big Thing，例如現時最紅嘅OpenAI，就係2015年由馬斯克、亞馬遜網上服務（AWS，母公司股票：AMZN）及Peter Thiel等人夾份投資10億美元搞出嚟嘅「非牟利團體」， 後來Facebook（母公司META）及微軟（MSFT）亦先後向OpenAI提供資金或組成合作關係。

當日人哋冇拎晒啲錢去買樓同炒殼股，留返一筆嚟買未來，依家收成雖然表面上微軟賺晒，實際上今年AI係救返科技股嘅主因，亦都引嚟無數其他企業進化做AI，股價因此上升。

至於納指破頂嘅啟示，2020至2021年上升趨勢多次連環破頂，但係當時兩個頂為之間差距太近，所以唔計，我哋拎一啲兩者相距約半年嘅來作比較。

最近一次就係2020年疫情前高位9838點，2月開始下跌，6月已經破頂，呢次嘅破頂近乎直接上升，一去無回頭。

另一次係2018年10月開始調整，2019年4月首次破頂，但係股價反覆橫行，要等到10月先真正開波上升。

再數多一次就係2016年1月，當時納指點數仲係5100點階段，回落大半年至8月再破頂，之後一路喺破頂水平糾纏上落，直至11月先至正式突破。

今次納指破頂後只會升得更多已成定局，AI作為領頭概念的確係勁，但係過去美股領頭嘅概念包括手機革命、搜尋器、社交媒體、電動車，當時都一樣咁勁，但係都唔包保破頂完全唔需要調整。

納指就好似坐國泰航空（293）嘅飛機咁，買咗機票上機，一定會送到你去目的地一樣，不過中間會唔會有氣流或者其他嘢出現，就真係要睇彩數，上得機，深呼吸，唔好咁多投訴，瞓一覺等到目的地先醒吧。至於今次目的地，起碼都16100點，大概升22%，即係20年同19年破頂後首站嘅升幅。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出