笑到最後|細說晶片競賽的核心(高明)
彭博引述政府高層報道,中國過去十年投入半導體業數百億美元,卻沒有突破性發展,高層領導感到憤怒。
美股、外匯、加密貨幣免費即時報價,自選投資組合獲取相關新聞提示。
晶片變得重要,源於美國特朗普總統行政機關制裁華為,禁止供應含有美國技術嘅晶片,2020年台積電(TSM)公佈9月14日後不再出貨華為,令到本來有力挑戰蘋果(AAPL)三星手機地位嘅華為,喺手機市場中沒落,加上2020年疫情供應鏈短缺,冇晶片汽車市場即刻大幅減產,不論係高端同低端晶片,任何有指令集嘅功能,都需要晶片,爭在運算速度、大細同散熱需要而有先進及成熟製程分別。
企業資本開支大
上述彭博報道未有中國官方傳媒跟進,所以未必可信。不過如果淨係睇三大晶片企業台積電、三星及英特爾(INTC), 佢哋嘅資本開支都唔細。以台積電為例, 2019年資本開支為150億美元,至2021年升至300億美元,並預計2022年達440億美元。 三星晶片部門計劃由2021年中嘅資本開支1150億美元升至2023年嘅1510億美元,英特爾2021年資本開支則係台積電一半,達150億美元。
最燒錢係光刻機,路透社報導ASML(ASML)正研發一款新的半導體EUV極紫外光光刻機,價值4億美元。2021台積電買55部,三星買20部,數字一乘上去其實100億美元都唔係太見使,仲未計背後要請無數個爆肝博士操作呢啲機械。
以數字論數字,1,000億美元十年,大致上追得上三大廠,但就有如賽跑一樣,三大廠跑喺前面,其他後起喺後面,大家速度一樣,係無可能追得上。
此外,ASML係全球晶片命脈,光刻機亦唔係有錢買到。事實上,撇除政治因素,ASML同三大買家台積電、三星及英特爾同時有股權關係,彼此維持緊密的股權及合作關系,透過科技領先創造霸權門檻,呢個圈子並唔係有錢就交易到,好似之前台積電總裁魏哲家曾接到車廠高層致電,表示急需25片晶片,但係台積電接單以2.5萬片起標,不時存出蘋果、AMD(AMD)之類嘅大買家都要爭產能,行內有一個獨特嘅生態同默契,似乎唔係外人輕易可以打入核心,充其量都係做核心外圍。
順帶一題,台積電啱啱崛起時,原有舊勢力係日本Nikon,原來英特爾有心扶Nikon,多一間代工傾價好傾啲,可惜扶唔起,變成今日台積電領先地位。
所以中國暫時追唔上都唔係太意外,因為晶片廠真係純粹燒錢,歐美都推出晶片廠補助,老實講更加睇淡,因為歐美人工更貴,工時又短,點解晶片先進技術會由日、台、韓輪流佔有(日本仍保持上游材料技術),有佢亞洲獨特優勢。
但相信中國最終會搞掂,所以問題不大。
高明
facebook:https://www.facebook.com/bigricetea
IG:https://www.instagram.com/koming.usstocks/
作者簡介︰賺錢係目標,炒股係手段,專欄記載由手段到目標嘅過程。
本欄逢周三刊出