雅虎香港財經 笑到最後｜美國減息 應否回流？（高明）
美國聯儲局減息半厘，納指立即重上萬八點水平。社交媒體上見到好多專家都講，美國減息代表美國步入衰退，近期成為YouTube流量密碼回流潮，又再次值得討論。
美股外幣即時報價 多國新聞任睇
減息美股必升？
根據歷史數據，美國聯儲局進入減息周期後，標普500指數一般有明顯的上升趨勢，但具體表現取決於當時的經濟環境。
DataTrek分析員Jessica Rabe舊年已有報道，歷史上，聯儲局減息後的一年內，標普500平均會有約17%的增長。例如，1995年和2006年減息後，標普500分別上升35.2%同20.7%。最近一次減息周期（2018年12月）後，市場上升了27.9%。
不過，減息周期後並非總是會帶來增長。在某些經濟困難時期，減息反而與股災或市場大跌相關。例如，2001和2007年減息周期中，標普500分別下跌了9.6%和17.8%。這兩次下跌主要是由於科技泡沫破裂和金融危機。
根據Pinpoint Macro Analytics數據，在過去50年中，減息後標普500有70%機會錄得正回報。雖然減息通常有助於推動股市，但具體效果還會受到當時經濟形勢的影響。例如，經濟衰退或企業盈利下降時，減息可能無法立即提振市場。
衰退利好舊霸權股
減息對高增長股例如Tesla（TSLA）同Nvidia（NVDA）受益較多。呢類公司通常有較高嘅資本需求，用嚟進行研發、擴展業務和推動創新。Tesla電動車銀碼大，一般消費者都需要貸款廣租賃合約買車，減息對賣車影響直接。即使係Nvidia， 亦一樣受到利率影響，正如甲骨文創辦人Larry Ellison爆料，喺矽谷一場飯局入面，佢同伊隆馬跪求黃仁勳提供 GPU，畀多多錢都肯嗰隻。晶片軍備競賽，融資買顯示卡都係一種投資，亦係刺激研發需求。
不過，高增長股回落幅度亦大，萬一發生減息兼衰退嘅情況，舊霸權股或者更穩陣，例如可口可樂（KO）同寶潔（PG），代表住一類傳統行業巨頭，佢哋喺全球市場中佔有穩定地位，無論經濟周期如何變化，消費者對佢哋嘅產品需求相對穩定。根據過去十年可口可樂嘅累積回報率約為67.93%，而寶潔升103.66%。
論升幅計一定冇得同高增長股比較，但回流到道指股份，亦係持倉入面其中一種選擇。美國減息，如果高增長股升得太急，就係回流傳統股嘅時候。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
