雅虎香港財經 笑到最後｜美股嘅「港股化危機」（高明）
捱過2022年，2023年第一季帶畀大家嘅，就係歐美銀行危機。由於已經發生咗一排，所以已經過咗新聞周期。至於結果，連同聯儲局加0.25厘嘅決定，就係出現加息及擴表同時進行嘅局面，聯儲局資產負債由3月8日的8.39兆（又稱萬億）美元，升至3月21日最新公佈嘅8.733兆美元。
美股外幣即時報價 多國新聞任睇
聯儲局同時加息及擴表這一舉動喺過往係罕見，因為兩種政策相互矛盾。加息旨在收緊貨幣政策，遏制通脹，而擴表就係寬鬆政策，現時則係增加流動性救市。
先講加息，自從舊年急速加息，至到今年篤爆銀行資產後，先至發現呢代人原來唔投資，你睇銀行爆煲就知道，根本原因就係大家慣咗零息係常態，冇諗過會有利率，稍為出現利率，突然間短債長債已經係一個問題，仲未計零息衍生嘅加密貨幣或同類投資，一加息就頂唔順。
加息擴表同步發生 股市難突破
高明相信有份處理近期爆煲銀行嘅銀行家，大部份都係經濟金融學專家，但係喺零利率得耐，理論放埋一邊，行為趨向投機。始終利率就係投資把呎，自從08年後，好耐冇見過乜係利率，唔能夠量度，無咗risk free無風險利率去比較，唔博就係零息，部份區域負利率，變咗個個都要博。一博，就係投機。
至於加息同擴表同時發生，對股市有乜影響？擴表有如量寬咁提供子彈，同時亦有投機嘅逼切性，因為貨幣會被溝淡；同時加息嘅代價，就係資本放喺度都會有利息。簡單嘅結論就係風險夠低，就會有人去博，風險一高，就即刻縮去收息。
如果加息同擴表係同時並且持續發生，高明預言，美股變成港股永恒唔上唔落嘅機會大增，因為估值一貴，風險上升，就有條件用息口同回報比較；另一方面，股價跌到殘，又有擴表畀膽大家投機。
現時金融環境，不得不令人相信，美股將「港股化」無止境咁走唔出循環上落嘅死局（港股好似向下破局，此乃後話）。除非有新科技出現破壞性創造破局，否則好難創造大牛市升勢環境。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
