笑到最後｜美股跌市中嘆杯茶（高明）

對於玩美股時間較長嘅人，面對今浪跌市，可能會食個tea然係話「係咩碰」。 (MicroPixieStock via Getty Images)

星期一美股稍為下跌，納指再跌4.29%。對於近兩年先炒美股嘅人，可能會話：輸死喇、畀返啲錢我、熊市走呀。對於玩美股時間較長嘅人，可能會食個tea然係話「係咩碰」。正如上星期所講，本欄冇「執笠」，所以唔會無端端走去「清倉」。事實上，2020年疫情最嚴重個月，高明都冇清倉，分別係，當年仲有標普反向三倍ETF SQQQ，今次就冇，而今次心情明顯較2020年坦然，所以可以話自己心態又進步咗，此乃後話。

下載Yahoo財經APP

美股、外匯、加密貨幣免費即時報價，自選投資組合獲取相關新聞提示。

至於投資得耐嘅人點解會去咗食tea？凌晨唔係應該瞓咗嘅咩？真正原因，係睇透市場嘅本質，有一說法：股市反映人性，或者學術啲叫股市反映一個民族嘅性格，係一門社會科學。

網民鍾意叫港股做港女，如果睇股價走勢，呢個比喻100分。港女一詞最初係貶意詞，奄尖腥悶、貪小便宜、唔溫柔、冇身材等等，呢啲都係錯誤嘅刻板印象。港女深層次DNA係純粹講feel，連自己都唔知想點，作為男友（投資者）做乜錯乜，業績好，跌；業績差，跌；無厘啦更又會升到爆。香港好多大企業、基金、有錢佬家族基金都係搵「阿姐」head個office，所以以難怪港股走勢都係睇心情。

至於美股，雖然近年鍾意用左膠大愛包裝，但一講到錢，個個都變返牛仔，性格分明，即使AI，都係學人。本身美股有住全球獨有嘅美國夢，九唔撘八嘅股因為夢想都可以升，升市可以連升一兩個月，牛市長達十年，跌市亦唔會含糊，好似啲大美帝主義電影咁，主角唔係以一敵百，就係被幾百人圍毆，港股跌市有時都「妹吓妹吓」，美股一跌，就要蒸發三五年升幅先開心。

所以知道點解今次要去tea未？唔沖返杯茶，又點可以喺股價上落之中，欣賞到唔同民族嘅性格構成。

冇買SQQQ 反而係進步

大家可能會問，跌成咁可以點算？好似馬某某首富話齋，買一間你真心相信佢產品及服務嘅公司，只有產品變質先賣佢嘅股票，呢個策略長線會湊效。當然我要提醒大家，因為只有美國呢個招牌支持下嘅美國企業，先可以成為世界霸權，所以產品好股價好，亦都只限美股，美股成功的一套不能照搬其他股市。馬首富過往主要生產美國股票，如果佢問吓股神拍檔芒格，可能會講得再準確啲。

再加一個前設，就係唔好槓桿，雖然有時高明都忍唔住，但槓桿長線無助表現，升嘅時候畀息，跌嘅時候畀息同輸突，最麻煩係會穿，連同TQQQ在內嘅槓桿嘢真係唔好掂。

至於一開始點解話自己跌市冇SQQQ反而係進步？因為根據馬某某買股準則，睇淡美股，等於同一時間覺得504間最大型嘅美企產品唔work，即係以一敵所有史泰龍、未來戰士、畢彼特、湯告老師、Ladygaga、Taylor Swift等等，係信念以外嘅事，三倍槓桿更加唔想掂。如果自己信to the moon，然後股價一跌就清，其實你信嘅係股價，唔係嗰件事，喺股壇入面，呢個水平層次好低，升嗰隻買嗰隻，升時講到天花龍鳳，一跌就驚，有冇講錯你先？

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出