雅虎香港財經 笑到最後｜英鎊滙價大跌的啟示（高明）
英國新首相卓慧思政府公佈迷你預算案，大幅減稅，隨即引發英鎊鎊滙大跌，由一個本土政治事件轉變為宏觀國際財經大事。稅務就係勞役，一個新政府竟然主動減稅，有如業主立案法團主動減管理貴咁稀有，觸發滙市震盪，一係有Deep States深層政府不滿，一係金融業嘅本質就係反改變，今次事件睇嚟就兩者都有。
美股、外匯、加密貨幣免費即時報價，自選投資組合獲取相關新聞提示。
當然，相信推出前已經預咗會有爭議，特別係取消45%最高稅階，如果純粹從政打份工角度，根本冇必要冒險減，被人話偏幫有錢人，完全唔需要做。但偏偏有做，連同約瀚遜病毒共存、卡梅隆脫歐公投，英國國力唔強，賭係關鍵時刻嘅出路。
取消最高稅階時機佳
每100蚊生產力抽走45蚊去貢獻政府，成件事本身係不合理，一早應該要取消。依家係咪適合嘅時機？過往咁多年冇人做，依家唔做，就繼續拖，所以當下取消，就係最合適嘅時機。
雖然取消嘅係年薪15萬英鎊收入以上抽稅嘅45%，同大部份人冇關，但依家先打大佬45%最高難度，取消咗之後，下一個處於風口位嘅最高稅階就係50,270英鎊以上抽40%。呢個關口就係英國人畀人覺得做夠收工嘅制度影響門檻。收入最高嘅稅率都夠膽取消，合理推斷只要佢在位冇被趕落台，下個最高嘅40%都會慢慢下調。
事實上，全球量化寬鬆後遺症，人工紙水上遲早要加，呢個數字只係港幣月入3.5萬元，發達國家水平唔算高薪，唔係好高人工以上就抽40%，完全係反生產，收夠籌主義。購買力越嚟越低，不久將來嘅同一份糧更加唔見使，一係將稅階調高，一係減稅率，現屆政府就選擇減稅率，做法更加直接。
至於令到鎊滙下跌嘅憂慮：財政可持續性。最理想嘅狀況，就係以前嘅香港，稅率低，政府亦都大把錢，一般人生活毋須依賴財政預算。外國政府冇乜可能做到冇負債，減稅刺激經濟亦太離地，實際作用係藏富於民，政府拎嚟孭債，發債代替收稅，英鎊變冥幣；減咗稅荷包多個錢嘅人自求多福，現代大把工具，由美元到加密貨幣，自己揀。
港人經歷多次風浪後嘅集體智慧買樓，唔見得輸得去邊。有朝一日稅率降低到有錢剩，唔使嘢嘢靠政府，可以扭轉英美世界糧單到糧單鋪鋪清嘅刻板印象。
病毒共存算賭贏，脫歐有自主但物價貴一半半，未來可能有俄羅斯核戰，減稅令滙率跌已經係最冇人命傷害嘅事件。講到尾，疫情、核戰、滙率，都係指向同一方向，就係要自己搵安全地方。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
