笑到最後|2025三招救樓市(高明)
要救樓市其實好簡單,至少有三招。
要救樓市其實好簡單,至少有三招。 · South China Morning Post via Getty Images

中原城市領先指數CCL最新報137.64點,按周微升0.36%,樓價終於錄得升幅。新年流流,本欄繼續發放正能量,香港過去長期藏富於民,政府庫房經歷赤字相對全球各國政府仍然係大把錢,要救樓市其實好簡單,至少有以下三招:

下載Yahoo財經APP

美股外幣即時報價 多國新聞任睇

1. 資產負值補貼

全世界只有政府會喺你賺錢嘅時候屈錢,香港大可以創先河,不但唔抽資產增值稅,更加喺你蝕錢嘅時候救急扶危,例如買入後五年內賣出,如果蝕錢就政府包底,上限500萬港元之類,情況有如iPhone頭幾代,可以原價退錢,吸引大量炒家無風險炒iPhone,套用落樓市亦一樣,如果賺就自己落袋,蝕有政府幫,用家知道最多蝕使費,就會大膽落場搏命,樓價想唔升都幾難。

至於推動公務員買樓嘅誘因,包括有樓先可以跳point加薪及升遷。
至於推動公務員買樓嘅誘因,包括有樓先可以跳point加薪及升遷。 · ANTHONY WALLACE via Getty Images

2. 公務員全民買樓

公務員一向薪高糧準,冇買樓實在浪費,一旦入市,將會成為樓市嘅一個強大購買力。政府大可以立法修例,公務員以及所有同政府相關機構嘅員工,包括立法會、司法機構、教師、公營機構、港鐵(0066.HK)、港交所(0388.HK)、馬會、非政府但又收政府錢嘅組織等,必須要持有香港物業,並且購買物業要同薪酬成正比。至於推動公務員買樓嘅誘因,包括有樓先可以跳point加薪及升遷,主任級以上更必須持有香港樓宇先可以任職,未買樓要6個月內立即買樓維持職位,新入職亦將買樓視為試用期條件等等,情況好似上市公司出紅股畀員工咁,令到街外投資者更有信心持股,公務員齊齊買樓,其他市民見到,即刻諗:你係規則制定者都入市,一定有料到,我都買埋一份!

政府只要立法陸路離境稅,每人每次陸路離境要畀兩舊水,一家四口八舊,去深圳飲飲食食有成本,自然留港消費。
政府只要立法陸路離境稅,每人每次陸路離境要畀兩舊水,一家四口八舊,去深圳飲飲食食有成本,自然留港消費。 · Cheng Xin via Getty Images

3. 陸路離境稅

唔少香港人及高才通只當香港係搵錢地方,到使錢嘅時候就北上,部分甚至連居所都喺另一邊,令到香港樓價更加缺乏購買力。政府只要立法陸路離境稅,每人每次陸路離境要畀兩舊水,一家四口八舊,去深圳飲飲食食有成本,自然留港消費。

另一方面高才通每日跨境返工,少數怕長計,都會諗喺香港買樓安身立命。當然陸路離境稅有豁免,就係如果喺香港有買樓就免離境稅,提供誘因買樓,政府甚至可以更大方,2025年入市頭一年任搭港鐵,以及港交所買股票交易免印花稅,作為回贈。一般香港人,如果喺香港有買樓已經等於透支未來大部份消費力,其實唔使太擔心佢上深圳洗幾舊水飲飲食食。

只要肯立法,樓價要升其實唔難。預祝大家2025年齊齊發達!

高明

facebook

IG

作者簡介︰賺錢係目標,炒股係手段,專欄記載由手段到目標嘅過程。

本欄逢周六刊出