笑到最後｜AI股炒風見證投資者其實冇所謂（高明）

只要有公佈業務上有引入AI，股價自然水漲船高。

OpenAI啱啱開始退出ChatGPT時，Google（GOOGL）首當其衝，連帶其他好多軟件股亦都被懷疑會比ChatGPT取代。

下載Yahoo財經APP

美股外幣即時報價 多國新聞任睇

只係少於半年時間，AI股大熱，只要有公佈業務上有引入AI，股價自然水漲船高。正如上星期所講，美股自動分為有AI及冇AI兩部份，冇AI表現當然差過有AI。

升幅係證明咗，投資者根本唔在意公司AI有冇競爭力，舉個例，最先嘅AI估係微軟，因為覺得ChatGPT+Bing嘅New Bing有力取代Google，真係用落又好似唔係嗰回事，但股價照升。當然佢本身持有OpenAI就係一件寶。

Google就更明顯，推出Bard，同ChatGPT一樣，係一個chatbox語言生成模型，用過就知，仍然係ChatGPT較好用，起碼支援更多語言，而且ChatGPT 4要收月費，加埋圖片及API按用量收費，已經直接有收入，有獲利模式，相對Bard仍然免費。不過股市唔會睇呢啲，只在乎公佈一刻有冇關鍵字，有，喺呢個投資主題之下就有資金追捧。

太理性問題暫不思考

事後解釋亦驗證咗Nvidia（NVDA）點解長年升，因為電競、晶片熱、加密貨幣、自動駕駛，到最近人工智能，全部都有份，其中一個概念當然，佢就有份，堪稱美股界嘅全餐股。

現時繼續係炒巨無霸及純AI股為主。巨無霸中，尚有蘋果（AAPL）、Netflix（NFLX）、Tesla（TSLA）未正式公佈AI應用。Meta（META）衰咗元宇宙，一個轉身搞AI，未有咩成品已經被市場認可做AI股。上述三隻只要隨便講句有AI，乎合今年主題，股價下半年跑出並唔難。

特別係Tesla，大股東Elon Musk自己已搞AI語言生成，本身又係OpenAI創辦人之一，借呢個勢推高股價誘因唔低，至於AI加入電動車有乜作用，同自動駕駛有乜分別，太理性嘅問題暫時冇影響，始終股價升咗之後，先開始衡量業務追唔追得上。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出