【筍工】賣魚學滿師 月入3皮
你以為肉類分割技術員月入兩萬已經叫高人工?Sorry,你望吓隔離魚檔,原來仲高啲人工,人工可以高達3皮。
最近網上有海鮮魚檔開Post招聘「魚檔學徒」,仲要係各區大量招聘,月入$18,000,一入職已經高過香港人工中位數,而且比好多大學準畢業生仲要高出一大截。再睇埋落去,當學滿師之後,人工仲不得了,可以有成$30,000,比唔少行業的中層仲要高,小編睇到都有少許心動。
因為咁,小編就打咗個電話去問吓,對方就話工作職責好簡單,返上晝7點半至晚上7點半,工作雖然長,但都有得輪休,主要學習劏魚技巧及售賣技巧,亦要協助師傅工作,勝在唔使學歷及工作經驗要求,仲有年假7至14日(睇師傅心情同淡旺季),更更更重要係,唔好怕腥味同嫌污糟囉。
睇到呢度,雖然好似有少少難頂,但再望吓份人工,我都想試吓學習做一個風流倜儻嘅賣魚佬,以提升賣魚佬嘅社會地位為使命。有冇人「跟隊」?
來源︰搵份好工facebook
===================
19網輕鬆爆料熱線,歡迎舉報老細同事19惡行,立即click入去講畀我哋知啦