約8成打工仔認為 公司茶點好重要
打工仔女返工會出幾多力,唔單止睇老細肯俾幾多人工嘅。早前曾有研究指,心情愉快嘅打工仔女,其生產力將提高12%;相反,唔開心嘅人,其生產力便會下降10%。
近日國際諮詢和建築公司Mace一份報告亦指,約20%受訪打工仔女因工作環境欠佳,例如辦公室無自然光、有啲好麻煩嘅同事、無提供咖啡和茶,仲有環境太嘈嘅關係,導致佢哋平均每週約有2.4小時嘅工作生產力甚低。
當中,以18至24歲組別最多人受影響,有25%嘅年輕打工仔女表示,平均每月約8個小時嘅工作效率都係超低。
該研究亦引述了2018年Leesman嘅研究數據,指出79%嘅受訪環球打工仔女認為,提供茶點和飲品嘅設施,屬職場重要特色;另有44%嘅人指,向別人學習為重要工作。此外,少於三分之一嘅人表示,對辦公空間嘅噪音水平感到滿意。
事實上,返工已經唔係一件值得開心嘅事,仲要日日困喺無人情味兼環境差嘅地方至少8個鐘,員工能有心機開工,做老闆嘅有賺啦。只可惜,呢個世界有太多「又要馬兒好,又要馬兒不吃草」嘅衰老細,結果還是苦了一班打工仔女。
===================
19網輕鬆爆料熱線,歡迎舉報老細同事19惡行,立即click入去講畀我哋知啦