雅虎香港財經 股神巴菲特押注蘋果買一得五
即使巴郡去年開始輕輕減持蘋果，但蘋果仍是巴郡最重倉股票，亦是近年巴菲特最觸目的投資。股神押注蘋果，未來更有機會買一得五。
美股、外匯、加密貨幣免費即時報價，自選投資組合獲取相關新聞提示。
起步只係「代購」一千萬股
巴郡近年有一些投資舉動唔太「巴菲特」，關鍵原因係柯打出自股神兩名投資經理Todd Combs及Ted Weschler之手。巴郡於2016年首次買入蘋果，亦係由Todd Combs及Ted Weschler其中一人基於睇好蘋果而決定「代購」的，首次入貨量只係一千萬股，相對現在巴郡持有8.871億股蘋果只係濕碎料，但當年已經係震撼市場的舉動。
首次押注係由投資經理「代購」，但增持蘋果這項決策就頗有股神風格。巴菲特在訪問時曾提到他運用了投資大師Phil Fisher提倡的「八卦投資法」（Scuttlebutt）去了解蘋果，即係從日常生活「八吓」蘋果產品的吸引力。結果他觀察到自己孫仔及唔少人日常生活已不能沒有iPhone，而且他們手上有了一部iPhone仍會再買一部新iPhone。故此股神判斷蘋果係擁有不可思議「黏力」優勢嘅強大消費股，一如他多年愛股可口可樂。
巴郡在2019年年報披露，蘋果持股入貨總成本約360億美元，雖然巴郡把握過去一年蘋果大升啟動減持，現時持股價值仍達約1200億美元。賺錢水位如此驚人，既提供空間讓巴郡日後再減持套現「零用」押注新投資，亦增加長揸本錢實現買一得五「收成」。
蘋果有望成晶片、金融、汽車股？
蘋果最為人熟悉的核心業務係電子消費產品及服務收入，老本行消費產品表現仍然強勁，2021年首季業績單係iPhone營收就達656億美元。預計未來數年屏下指紋及執走屏幕「瀏海」仍有力掀動新一波換機潮。穿戴式裝備係同樣發揮蘋果「黏力」優勢的產品線，單係今年首季營收額就達129.7億美元，拋離Mac系列的86.8億美元。相對iPhone，穿戴式產品勝在入場費平，用家追款心理壓力就更輕，頗有潛力成為蘋果長賺長有的系列。
蘋果服務類收入係近年另一收入亮點，訂閱服務如iCould、Apple Music係唔少iPhone用家慣用的服務，另外亦包括「虛擬收租」，即係App Store收取的三成佣金。服務類收入今次首季營收高達157.6億美元，不過面對訴訟戰及被指食水深壓力，蘋果已公布營收百萬美元以下開發商提供減半佣金措施。雖然未來「虛擬收租」業務可能會賺少咗，但鞏固App Store優勢及訂閱服務，亦有助綁住用家，令他們不會輕易放棄使用蘋果產品。
除了上述兩大業務，蘋果亦有力涉足晶片、金融及汽車領域。先講金融，股神曾稱讚Tim Cook資金配置手法相當聰明，如用低息發債回購股份及派息，令巴郡持股「無本」由5.2%略增至5.4％，巴菲特更以此為例子說明企業回購的力量。除了發債，蘋果亦透過買美國國債、企業債、貨幣基金處理手頭的巨額現金，難怪有分析指蘋果的「投資」業務規模已算係全球規模最大對沖基金之一。
至於晶片，蘋果發布自研M1晶片引發新一輪Mac用家換機潮，同時亦令蘋果擺脫對Intel晶片的依賴，甚至使Intel再次申出橄欖枝，表示未來樂意為蘋果研發晶片代工。蘋果更公布斥10 億歐元在德國建立晶片設計中心，在近月全球鬧晶片荒情況下，投資者都驚覺晶片研發及生產能力的價值，蘋果手握晶片技術優勢，又與龍頭晶片企業如台積電合作無間，足以為蘋果注入晶片投資概念，降低晶片技術落後於同行的風險。
最後係電動車，Tim Cook早前在專訪中提到自動駕駛係核心技術，並指蘋果喜歡整合軟、硬件及服務，認為這才是奇跡發生的地方。按Tim Cook的講法，蘋果造車重點係自家研發的自動駕駛電動車。電動車市場「權威」Elon Musk早在2015年就表示蘋果加入電動車市場係合理的下一步。現時蘋果確實已申請多項涉及自動駕駛的專利，包括感測器、通訊及控制等重要範疇。不過最保守估計蘋果自駕電動車面世最快都要到2024年，假如股神有耐性繼續持貨，將來巴郡就有機會毋須額外成本多一隻星級車股了。
雖然股神揸蘋果未來有望「買一得五」，不過相對顛覆性創新股份，現在的蘋果算係「悶股」，假如你追求回報增長，想仿效股神重倉蘋果就先要衡量自己持貨耐性了。
