香港股市 已收市

與剛買樓朋友食飯的 7個應對方法

筆者朋友剛買樓,於是其他朋友,都不敢再在whatsapp group內貼樓市爆煲的消息。下星期大家約出來食飯,於是朋友們另外開一個群組,討論當日如何應對。

朋友有做銀行的,有做地產的,其實食飯要完全不討論樓市,根本不可能,而他們的方法如下:

  1. 如果買樓朋友主動提及,大家會轉移視線,轉為討論地點交通,但一定不能提裝修,因為朋友已經蝕咗筆裝修。
  2. 當朋友主動提到大市走勢,就引述更多專家不可信的例子,例如大行出晒貨先會唱淡樓市、見頂都見咗幾年等等。
  3. 有朋友建議訛稱自己當年入市模頂,用阿Q精神,印證自住其實無問題。
  4. 因為有另一位朋友做銀行,大家決定由他解釋按揭問題,其實最緊要自己到價,安慰他,供樓點都要經過幾個息口周期㗎啦。
  5. 有朋友建議迴避敏感字眼,不能提及「爆煲」一詞,只能說「調整」或者「快見底」,甚至好快又彈過等等。
  6. 如果朋友無提及,就盡量不提。如果講到移民在外地買樓問題,切勿比較香港樓市,如果有比較,會讓已買樓的朋友感到上車後已身不由己。
  7. 盡量講股票,因為樓市長遠,會令朋友有排擔心,但股市最多就打靶,痛苦也在一兩天。

筆者對上述方法,覺得頭頭是道;但如果是你,會不會覺得跟這種朋友食飯麻煩?如果朋友剛買樓,你還會不會約他食飯?

===============

財經精選資訊網站「中環街市」  臉書粉絲頁