舊款iPhone禁售 蘋果才是大贏家

蘋果今年最明智決定應該係不再公布iPhone銷量，除了新款iPhone要減產，最新衝擊係內地福州法院頒令不准蘋果在內地銷售七款舊型號手機。假如舊款iPhone確實要在內地下架，誰會是大贏家呢？

正路睇贏家當然係高通，一來官司戰暫佔上風，似乎有希望迫使蘋果就範支付專利費；二是打擊手機界強人蘋果，變相係為Android陣營手機大廠助攻，令高通更有把握爭取到Android陣營大廠的大單；三來內地透過今次官司迫舊款iPhone下架，亦可以在貿易戰上施一施下馬威，記了高通這一功，日後高通策動併購或與內地巨企合作，要取得內地當局綠燈就更容易。

至於蘋果，牌面睇係大輸家，不過市場又未必係咁解讀，皆因昨晚AAPL最後止跌回升。正所謂禁令係死，企業策略係活，舊設計借屍還魂係蘋果的強項，年前把iPhone 5s設計變成iPhone SE，就受到不少鍾情舊款機的果粉歡迎。如果iPhone 7、8、及X在內地強制下架，蘋果亦可以舊橋再用，把7、8的設計以「Classic」、「SSE」之名推出「新款」，繼續為內地用家提供平價選擇。至於iPhone X就更無所謂，雖然有傳蘋果恢後生產iPhone X，但iPhone X早前已正式下架，重推的話，大不了就只在其他市場重推，而內地就集中火力推銷三大新機XS、XS Max及XR。

即使舊款變「新機」需要時間設計及生產，這一段空窗期亦可能對蘋果有利，皆因期間內地用家想買機，又不想吸納水貨的話，就唯有入手新款iPhone。只要蘋果加大力度推舊機換新機優惠，「下架令」可能令蘋果賺得更多。

還有一批可稱為「小勝」的贏家，就係既會用iPhone又會用Mac的果粉。皆因從往績睇，蘋果只有陷入大逆境時，才會面對現實放棄超高價策略及加快更新款式。今年蘋果不斷遇上麻煩，手機對手拋出新設計速度又越來越快，似乎明年再靠改少少當新機未必行得通，手機業務萎縮，亦迫使蘋果要再投入心機發展Mac業務，例如早前蘋果就終於更新Macbook Air及Mac Mini系列。或許明年果粉有機會看到期待多年的iMac及Mac Pro大改款登場吧。

===============

財經精選資訊網站「中環街市」 臉書粉絲頁