英國資產咸魚翻生

.

英國脫歐拖了多年，期間有唔少本地財團把握英鎊大跌機會掃入英國資產，可惜一場疫情令英國資產價值一貶再貶，但時勢加上本地生意人頭腦，未來幾年英國蟹貨資產有望咸魚翻生。

英國政府公布放寬BNO居留英國甚至入籍規定，雖然最後定案係點仍是問號，但此舉已足以令本地有產階級重拾對移居英國興趣。本地有產階級作風係三軍未動、磚頭先行，只要對某個國家感興趣，第一步就係研究當地的磚頭。所以隨著限聚令放寬，近來英國住宅樓盤推介會開完一個又一個，為本地酒店帶來難得的生意。

.

除了住宅，商舖都係令本地有產階級垂涎的磚頭資產。剛巧英國因為疫情令社會停擺，商場、商舖價值跌入谷底。全英最大商場營運商Intu早前四出尋找白武士救亡（包括本地房託巨頭領展）不果，最後更要宣布申請破產。不過有危亦有機，正因為本地有產階級對英國商舖會感興趣，本地財團大可以故技重施，趁平掃入英國商場再翻新間細出售，只要入場費夠平，要一舖清貨應該唔難。

.

另外瞄準實際考慮在英國做乜好的有產階級需要，亦可以令財團的英國資產身價彈起。例如打算創業的人可能想自置一個小型辦公室，持有英國工廈或商廈的財團，就可以套用本地工、商廈間細單位當工作室出售方式，推出蚊型工作室單位，即可以把英國蟹貨工商物業高價清貨甩身。亦可能會有唔少人想以特許經營方式創業，貪有品牌有貨源有管理系統，這方面持有英國啤酒綜合企業Greene King的長實就有強大優勢，Greene King有二千多間酒吧餐廳屬於自置物業，如果長實推出Green King特許經營權，既可以收取特許經營費又可以收租，仲可以分擔營運成本一舉三得，Greene King這項大手筆投資睇怕可以大豐收了。

===============

精選資訊網站「中環街市」 臉書粉絲頁