香港股市 已收市

街市買餸用支付寶 會有問題(石先生)

支付寶 HK 同誠哥合作消息傳出後,大家都等緊響有咩大動作,但點知支付寶 HK暫時最響嘅唔係全線超市都用到支付寶 HK,而係觀塘嘅寶達街市全線可以用手機俾錢,真係有啲意外。

有人問點解同街市合作嘅唔係八達通,唔係信用卡,而係支付寶 HK 呢?唔通街市同支付寶 HK 有深層次合作,想將中國大陸最近好 HIT 嘅盒馬鮮生搬來香港云云。幻想總是美好,但睇番報導說明,支付寶 HK 能夠入街市,一來同街市啱啱翻新,管理公司牽頭有關;二來係支付寶 HK 今次合作完全唔收商戶手續費,商戶使用成本同現金一樣都係 0,相比商戶想用八達通收錢要俾租機費及交易費,支付寶 HK 今次呢個 offer 又幾難拒絕。

商戶嘅交易成本雖然係零,但執行上嘅時間成本都唔可以忽視。以支付寶 HK 現時嘅普及率及使用量,俾錢前先要去便利店買或者綁定信用卡,對一向用開現金買餸,最多去超市用八達通來儲分嘅街坊來講未必夠順手。

就算街坊俾優惠劵吸引,想用支付寶 HK 來俾錢都有一個教育、學習嘅過程。街市雖然由朝到晚都營業,但真係搵錢嘅都係個幾個鐘,分秒必爭,忙到洗手間都唔敢去。要商戶係博殺時段教街坊點用支付寶 HK 買棵菜未必咁容易。香港電子支付想急起直追,睇怕都仲有好多教育工作要做,唔會一夕之間成功。

作者:石先生(科技博客Stone IP

支付寶教學

===============

財經精選資訊網站「中環街市」  臉書粉絲頁