香港股市 將在 4 小時 36 分鐘 開市

診所職場事 【寶豬趣聞】手鈪食人|珍寶豬|經一專欄

珍寶豬

診所職場事經一專欄】有日有位太太嚟到診所。
佢急急腳行埋嚟同我講:「姑娘姑娘,救命呀,我隻手好似就甩啦」
…哇,玩咁大?
我:「有咩事呀?邊隻手呀?」
佢:「左手呀左手呀」

撰文:珍寶豬|圖片:電視截圖

延伸閱讀:

10年內節省100萬美元 40歲前提早退休 除了家庭開支 最大挑戰是…… | 理財解碼

借低息私人貸款6大常犯錯誤 被「利息特低」 吸引易出事 | 理財解碼 | 手續費 | 每月還款額

手鈪突然縮細咗

佢拎起左手,將隻左手放喺枱面,我見隻手都幾完整…
我:「你話你隻手就甩係咩意思呀?你甩骹呀?」
佢:「唔係呀,你望吓呢度」
我望望佢指住嘅位置,係一隻玉鈪。
我:「係~隻鈪,係咪太緊呀?」
佢:「係呀,我隻手就嚟俾佢整甩啦,佢唔知點解突然縮細咗呀!」
唔係佢縮細咗,係你漲大咗啫。

「隻鈪食緊我喎」

我:「哦~唔駛咁擔心啦,你去舖頭搵人幫你除咗佢啦」
佢:「但係而家隻鈪食緊我喎,已經食到入肉啦,唔係會甩嘅咩?」
你估隻鈪真係饑不擇食成咁咩~
我:「唔駛咁驚嘅,如果你真係擔心,一係我同你登記入去俾醫生檢查吓?」
佢:「會唔會收我錢㗎?」
我:「會呀,入得醫生房俾醫生睇就要收診金㗎啦~」

「冇咩事我都唔想俾錢醫生呀」

佢:「頭先你咪叫我去舖頭除嘅,醫生除唔除到㗎?」
我:「如果你真係想醫生幫你除嘅,醫生都可以嘅」
佢:「你知唔知舖頭平啲定醫生平啲呀?」
我:「呢層我真係唔知~」
佢:「哎,真係死得啦,我而家左右做人難,都唔知去舖頭好定俾醫生睇好,隻手又唔知會唔會就咁甩出嚟,我隻手好有用㗎」
你係咪睇太多卡通呀?定係你根本係薯蛋頭太太嚟?
佢望望診所嘅收費表,邊退後邊講:「我去舖頭問吓先啦,隻手甩咗嘅我先再返嚟啦,冇咩事我都唔想俾錢醫生呀」
嗯,太太最後冇再返過嚟。即係平安無事啦~

延伸閱讀:

300呎樓都賣$600萬 香港人點解咁有錢|經一專欄