財經八一八: 雷軍疑似自拍 兩會出位

撰文：戴道鍾

美術：Ricky

今個禮拜市場焦點離不開兩會，政治版追訪主事港澳事務人物，投資版就捕捉政策受惠板塊，各有各精彩。要咁重大場面中突圍而出，成為傳媒報道對象，少功力都唔得。當中，被喻為「中國喬布斯」小米科技董事長雷軍就得。

話說雷軍兩會咁莊嚴而隆重場合，竟然玩自拍，於是成功被央視直播出街，網民亦紛紛微博「些牙」呢個趣緻畫面。雖然，雷軍事後呼冤澄清謂，佢當時係搵緊角度影宏偉會場，不過，真相如何，who cares？最重要係位已出。

事實上，雷軍準備洋洋千字記者會上發表，提出對公司法兩項修訂建議，包括第一，回歸自由約定的本質，第二，股東之間的約定，只需要做工商備案，不要再做實質性審核......老戴翻查返媒體報道，呢咁正經八股話題，幾乎係零。

阿里進軍博彩業？

講開雷軍，內地科網紅人仲有「雙馬」，兩者更可謂百足咁多爪，阿里巴巴最新就竟然搞埋賭！事關亞博科技（08279）公布，向阿里巴巴及螞蟻金服旗下公司，配售約四十八點一七億股，每股作價零點三四七八人仔，涉資十六點七五億；同時，兩者又準備再認購最多二十點四九億股可換股債券，換股價都係零點三四七八，代價為七點一三億，成單「刁」總共花費廿三點八八億銀，行使晒可換股債，兩者就會住亞博六成權益。之後亞博會淘寶營運彩票頻道，而阿里同螞蟻金服就會以亞博作為申請彩票業務之獨家平台。

睇返亞博，主要內地提供彩票技術、體育彩票管理同營銷顧問服務，近年正式進軍彩票遊戲市場。簡單理解，可分為硬件及軟件兩大範疇，硬件係彩票終端機同驗票機，市佔率約四成，後者則貢獻整體收入逾八成，毛利率約一成，按內地彩票市場增長計，每年增長料介乎百分之五至十，前景好似唔錯。不過，高追亞博科技股民就唔多好彩，立即中伏，再次應驗阿里巴巴名字背後潛藏意義！

王利民跑到出書

人人都想週身刀，張張利，好似康宏金融（01019）主席王利民，真係「火麒麟」上身，仲玩到出埋書，舊年至出本個人食譜主席．煮食，今年又出多本記錄其個人跑步心路歷程極地狂RUN。

Quincy三度征戰極地，又唔放過任何一個本地同海外賽事，仲公開許下「７＋２＋１」承諾——有生之年跑遍七大洲、南北極同撒哈拉沙漠，老戴以為佢係跑步癡，Quincy則話自己係被逼就範。原來，十年前醫生話佢心臟血管閉塞，如想活命，一係戒口戒酒，食一世藥；一係就做運動，結果佢揀後者；要不下定決心做運動。

五龍股東有睇頭

創新、科技、環保，概念永遠唔完。最新大昌行（01828）旗下大昌貿易行，就同內地電動車製造商五龍（00729）簽署戰略合作協議，提供市場推廣、銷售、售後及維修等服務。

五龍電動車向來備受市場關注，皆因其股東背景屬於重量級。早前中信股分（00267）以四億六千五百萬元，認購五龍電動車十億股新股，目前整個中信集團持有五龍共百分之十一點三股權，為第二大股東。

此外，酷愛投資科技行業長和主席李嘉誠亦係股東之一。誠哥自二○一○年開始投資此公司，舊年公司副主席苗振國出售部分股權，誠哥及鷹君（00041）主席羅康瑞都有出手認購，依家持有十四億六千萬股，佔已發行股本百分之六點六三。