香港股市 將收市,收市時間:16 分鐘

【貿易戰】超級英雄隨時失業

《復仇者聯盟4》把超級英雄熱潮推向高峰,但亦有不少人解讀為熱潮見頂訊號,熱潮冷卻可能只係票房縮水,但更大危機係中美貿易戰升溫,或引爆超級英雄「失業潮」。

貿易戰美國「重拳」浪接浪,最新攻勢係禁絕華為產品踏足美國市場及由Google出手封印華為手機Android更新及關鍵功能。面對「重拳」來襲,中國當然要想辦法還擊,其中一項好使好用的戰線就係禁止美國電影在內地上畫。

全面禁止美國電影上畫對中方有兩大好處,一是斷了美國企業一條大水喉,單係《復仇者聯盟4》內地票房已突破40億人仔,更何況貿易談判難題之一係美國片商要求內地票房分成提升至40%,既然傾唔掂就倒不如一刀切禁之,無謂送子彈予對家的文化產業陣營。

二是意識形態問題,貿易戰升溫後,央視連播三日反美電影,如果再容許美國電影上畫,豈不是有違抵禦外敵主旋律。考慮到此戰略因素,中方確有誘因封殺美國電影。

一旦內地全面禁止美國電影,最受衝擊的當然係大堆超級英雄電影。皆因內地巨大票房是支持超級英雄長拍長有的重要動力,現在少了這條大水喉,超級英雄可以繼續拍,但就可能只限有票房保證的一線英雄,至於二、三線超級英雄,好彩就可以轉戰劇集,唔好彩就會被電影公司雪藏加入失業大軍。

內地禁絕美國電影除了令超級英雄失業,求過於供的戲院肯定會受到衝擊,大台押重注的戲院產業要翻身就難上加難,當然危中有機係中港合拍片需求會大增,大台電影製作生意或會受惠。

最後尚有一項杞人憂天級的憂慮,就係屆時香港會否跟從內地步伐封殺美國電影?現在大方向係大灣區融合,加上肇慶要搞一個「香港城」,大灣區及「香港城」無美國電影睇而香港有,豈不是令同胞尷尬?


===============

精選資訊網站「中環街市」 臉書粉絲頁