【走晒音】 16歲新人張若希 新歌《17歲的畸歌》樂評俾1分 填詞人因葵護駕︰網上欺凌

久不久樂壇都會有引來議論紛紛嘅「神曲」面世，好似早幾年女團FFX嘅Sugar Baby，就因為唱功欠奉加上低成本MV而引來網民恥笑。正所謂「長江後浪推前浪」，又有新「神曲」面世！

以《長腿叔叔》唱到街知巷聞嘅唐韋琪，近年做埋經理人，旗下藝人有16歲少女歌手張若希。佢首新歌《17歲的畸歌》嘅MV派咗台3個禮拜，本來無咩人知。facebook本地樂評專頁「論盡音樂」近日出post，將《17歲的畸歌》評為「破底 1 分作品」，認為「吐槽點多到數唔哂」，理由包括唱得差、走音走到得人驚、編曲好似冇做過、張若希喺MV表現生硬。

最好笑係呢個MV竟然有動作指導，但裡面冇任何打鬥或者跳舞場面，純粹係彈結他唱下歌咋喎。

呢番樂評引來首歌嘅填詞人因葵喺facebook出post回應，「我唔係唔俾你批評，不過你至少同我傾下音樂上嘅問題先啦」，又認為「你一刀插落個小妹妹度，唔係網上欺凌係咩？」。之後因葵再喺個人facebook暗寸樂評專頁「唔係求其copy and paste，乜嘢四台冠軍歌呀，再加幾張相片就交貨」。

唔少樂迷認同首歌到MV都有問題︰

至於唱歌嘅張若希（Cheyenne）只有16歲，5年前被唐韋琪喺佢開設嘅才藝中心發掘，今年出道並派過2首歌上台。Cheyenne希望可以兼顧學業同音樂兩方面。

而「論盡音樂」亦都留言解釋，佢唔係要「一刀插落個小妹妹度」，反而想製作嘅大人要檢討︰