道指跑贏恒指 市場訊息懶人包
當屯門新盤買家仍信心十足地入市時,反映經濟風向的恆指放完國慶假後就跌唔停,然而隔個大海的道指則維持強勢,道指跑贏恆指,究竟為大家帶來甚麼投資訊號?
恆指捱沽,市場最普遍的看法係因為內地休市,由於日前公布的官版方PMI指數都下跌,顯示內地經濟真係唔多掂,導致資金搶先做低港股。另一原因係美國與鄰居加拿大及墨西哥終於傾掂數,在無懼後欄失火的情況下,美國大可以集中火力對付中國。即使中美在12月重啟談判,因著辣稅在美國消費旺季利潤打扣折的中國,重回談判桌亦未必討會到多少甜頭,意味明年只會更難捱,在此情況下,港股只有弱上加弱。
衝擊港股當然不得不提加息,受制於聯繫匯率,港元總要跟隨美元價息齊升,不少人就想起當年有類似情況,香港付出的代價係人工、資產齊貶值,此歷史經驗又成為港股捱沽另一動力。
質低港股還有一項意想不到的衝擊波,便是「范爺」認錯兼支付近九億罰款。范爺認錯是意料中事,但罰款之高又令人意外,消息一出除了震散影業股,亦令人聯想到阿爺確係缺水,所以要四出「收數」,此訊號就頗不妙,因為國家隊過去力撐股市耐力已經一般,假如缺水要撐起股市就更難,在此情況下,大家就更睇淡中港股市。
(圖片:有網民找出舊劇照揶揄范冰冰)
作為小小散戶,現階段瞓追入美股又似乎高處不勝寒,暫時唯有增持現金,順手在強積金組合略為調高美股及保守基金比例。至於港股,本地銀行股反而可以看高一線,皆因發展商為散貨,有機會啟動劈價潮,港銀按揭生意可以在新一輪上車熱潮中受惠,不失為危中有機的選擇。
===============
財經精選資訊網站「中環街市」 臉書粉絲頁