長實打風露底 但照舊無有怕
山竹襲港後返工難過登天,有人開始懷念李氏力場。若然真係有力場存在,可能連長實自己都會感慨力場消失,皆因次次打大風,某些由長實發展的建築都會露底,但如果你以為颱風可以衝擊長實股價,又未免太天真了。
每次颱風過後,總有網民會重彈唔好買長實樓老調。但事實上長實多年來賣樓都貨如輪轉,一來長實有實力吸納靚地,不少項目單是位置已夠吸引,二來長實推盤出名有計,有需要時劈價加碼推優惠毫不手軟,所以當長實推新盤時,往往又可以輕易掀起搶購潮。分分鐘到時曾在網上堅決表示唔買長實樓的「高人」,看到有入手筍盤機會,就唔會諗咁多率先入飛。
至於商廈物業爆裂玻璃的災情,無疑會消耗長實一些修復成本,但以長實規模,這些錢只是濕濕碎。更何況以近年長實的策略,可能長線而言本地商廈物業賣一間少一間,改為收購海外物業。將來以高價賣走紅磡商廈,改為再次吸納倫敦地標式物業,反而是刺激股價的好消息。
還有一項關鍵因素,就係地產漸漸變為長實其中「一瓣」,更重要的任務是聯同長和系其他公司收購海外產業,又或像長和早前公布般,由長實以96億元買入長和基建業務未來收益,變相為長和提供併購新業務「子彈」。
這些任務基本上無懼颱風襲港,再加上超人父子積極增持,所以山竹走後港股下插400點,長實股價反而微升,反映投資者最現實,甚麼爆玻璃只是小菜一碟而已。
===============
財經精選資訊網站「中環街市」 臉書粉絲頁