雅虎香港財經 陳貝兒區永權戴透明口罩做主持惹質疑 網民：國皇的新衣
新冠肺炎持續蔓延，口罩已經變成大家日常生活嘅必需品。近日確診數字持續上升，娛樂圈亦有人確診，確診歌手施匡翹曾到訪無綫電視城，所以無綫亦有加強防疫措施，例如暫停拍攝劇集及節目主持必須戴口罩等等。有睇《東張西望》嘅觀眾都應該留意到主持們都有戴上口罩做節目，噚晚嗰集主持陳貝兒同區永權就戴上全透明口罩上陣。佢哋喺節目開始時就話佢哋係戴咗日本最新出品嘅立體透明口罩，除咗可以方便出鏡之外，仲可以阻擋飛沫。節目出街後，引起唔少網民留意及討論。
陳貝兒同區永權都有喺社交網站上載戴透明口罩嘅相片及影片，不過網民們反應兩極。有唔少網民對透明口罩有興趣，留言：「我對這個很有興趣」、「個透明口罩好cute😍💯👍」、「邊度有得賣？」及「我想問個透明口罩系（喺）邊到買？😉」等等，不過亦有網民質疑，紛紛留言：「個口罩真係有用咩？好似膠咁樣，點樣透氣呢？」、「好肉酸 戴返普通口罩好過」、「好似幾焗下喎」、「似兒童故事之。國皇的新衣🤣🤣」、「😱防唔防到菌架?」及「個口罩work 唔work 架？！」等等。
另外，陳貝兒同區永權都有分別接受傳媒訪問，陳貝兒就話呢款透明口罩係公司提供，等佢哋出鏡嘅時候方便啲，而戴上之後感覺舒服唔焗，仲可以阻隔飛沫同重用，至於效用等等嘅細節就要問返公司。區永權就話呢款透明口罩係公司喺日本訂返嚟，方便佢哋出鏡用，感覺舒服、可以阻隔飛沫又可以重用，喺講稿時都冇焗住個嘴。
