靠租Wifi蛋 年收入2000萬！爽Wifi李垣：想爸爸知我生性啦

爽Wifi創辦人李垣（Michael），曾經窮到無錢搭車返學，中五未讀完便出來打工，最後成為老闆。驟耳聽，你會以為又是會考零分但創業成功的故事，觀眾都嫌悶。不過，今次並非「冇學識都搵到錢」等老套劇情，而是未畢業先學做人。

Michael紅褲仔出身，被上司粗口「問候」是指定動作；做老闆後，他更明白尊重才可留住員的心：「老闆唔可以亂鬧同事，唔好當眾傷人自尊，因為幾多錢都買唔到！」爽Wifi收入在3年間勁升廿倍，去年收入突破兩千萬元，3年來員工流失只得1位，便是靠「佛系管理」這一招。

日劇《半澤直樹》有句對白「上司的過錯是下屬的責任，下屬功績是上司的功勞」，對打工十幾年的Michael感受最深，他認為：「一間公司成功，唔代表老細最叻，但失敗就一定係老細問題，絕對唔可以賴同事。」

翻開Michael的履歷，就像電視劇情，中三後出來半工讀，19歲那年爸爸中風，便肩負養家重任，多年工作在粗口問候下洗禮，令他明白到管理公司，老闆責無旁貸。爽Wifi近兩年生意十級跳，去年收入更逾兩千萬元，公司創立3年期間，只得1位同事離職，其餘90後新鮮人都選擇留低打拼。究竟點駕馭一班新人？

他認為老闆一定要親身上陣，前線客服，到後勤洗廁所都落手落腳去做，「我會自己去洗，同事見到你帶頭，就會跟住做。如果只係鬧，咁佢工作表現由80分跌到70分，對件事冇幫助。」他認為要想辦法將4名員工發揮成8名員工的效果，才能對外競爭：「一個人打工只會出六成力，唔會100%為公司，好老實人工福利我唔係最好，但我畀自由佢哋。」

他主張「佛系管理」，將決策權下放給員工：「只要Set好個框框，就任佢哋去跑，想佢哋去撞呀，撞吓個框框就會越變越大，對公司係好事。」同時亦讓員工可以遲到早退，只需要在員工日曆上Mark低即可：「其實個日曆我都唔會睇，公司冇HR管。」他又堅持不會以粗口問候同事；「因為尊嚴係幾多錢都買唔到！」佛系管理令他去取得某個最佳顧主獎，Michael拎起獎座感觸：「去到今日有啲成就，但我爸爸喺醫院已冇乜意識，唔認得人…」他遺憾未試過跟父母去旅行，希望讓父親知道，「原來阿仔都生性啦！」

回想創業路，Michael坦言自己很想發達，因為家境窮困，「中學媽媽曾叫我唔好返學，因為搭車錢都冇。」他中學時期曾想過幫同學罰炒校規，再將罰抄外判，賺取差價。三年多前裸辭，便花錢租個劏房office，強迫自己「上班」，最後以20萬成立公司，做旅行Wifi蛋生意，因為慳字，令他不敢亂花錢宣傳，第一年成績很差，只夠收支平衡，自己幾乎冇糧出，客戶數目增長太慢，令他意識到不能靠減價搶客，要營造一個品牌，例如每部機都附送旅行轉插頭，用繩捲好充電線等等：「應該要做品牌後做生意，鬥價錢冇特色，班客就唔會有Loyalty。」

他又想出機場專人送遞服務，又親自以Whatsapp回覆客人：「試過係吐露港停過3次車，就係要覆客。」 每次客人還機，都會親自致電查詢，「好用嘅話下次介紹朋友喎」細節令產品稍為升呢，讓客人記住。公司生意額由首年的100萬急升廿倍，到去年已逾兩千萬元，未來除了Wifi蛋，更推出翻譯神器、洗衣神器、潛水相機等旅遊用品，轉型為旅遊公司。

「一間公司成功，唔代表老細最叻，但失敗就一定係老細問題。」

記者：陳新政

採訪：陳新政 朱得志
編撰：朱得志
攝影：鄒潔珊
剪接、後期：何文超
編審：倪敏慧
編導：何文超