領展會否變紅底股？

舊經濟股近來氣勢如虹，電訊基建股中國鐵搭及友邦固然係大媽愛股，收租股領展亦長升長有，究竟領展會否成為紅底股，似乎係開始值得探討的問題。

過去漫長的低息周期，領展予人印象係高息收租股，然而當領展股價衝破80元時，收益率已插至2.8%水位，純睇收息回報就有點削。吸引基金及散戶繼續高貨，反而係領展有增長概念。

過去領展增長概念係靠翻新舊商場提升租值，不過這一招催谷股價效率唔夠快，及後領展開始打包式出售商場、停車場，再同步吸納中港寫字樓及高檔商場，「賣產＋換貨」概念就令領展轉型為增長型的物業投資巨企。

就以去年尾領展再出手賣產為例，領展以120億元出售旗下12個商場加4789個車位，消息公布後領展由77元一直上衝至87元歷史高位。現在美國加息周期有機會提旱結束，甚至可能改為減息，領展這類派息穩定又有增長概念的股份就最受惠。只要領展再公布新一輪賣產部署兼賣得好價錢，在基金及散戶合力發功下，要衝破90元大關其實唔難。

餘下的問題係領展最終會否變紅底股，參考過去獲基金爆炒的大藍籌如思捷、渣打，要製造神話最好就係把股價谷至過百元。既然領展過去四年都會斥資回購自己股份，睇怕領展管理層如非必要都唔會玩發新股集資以免震散股價，況且領展仍有過百個香港物業在手，至少可以玩多六、七次打包式出售行動，加上每年仍有政黨要求規管領展加租，為領展賣產行動贈送強勁理由，所以領展晉升為紅底股確實並非幻想。

當然長遠而言，領展盡沽手上涉及民生的本地物業，換來一籃子內地商場、辦公室及本地所謂新商業區的辦公室，領展難免會變得平平無奇，到時是否仍值過百元一股身價就成一大疑問了。

===============

精選資訊網站「中環街市」 臉書粉絲頁