香港股市 已收市

首置計劃將成新盤「例菜」?

一如所料,新世界屯門新盤天生樓15伙首置計劃盤成功用半粒鐘清貨,正所謂瘦田無人耕,商業觸覺一流的會德豐地產日前放聲氣研究推出首置計劃。其實從經濟風向到發展商推盤考慮,首置計劃都有機會成為今後新盤的「例菜」。

股市通常係樓市的先行者,美股大跌震動亞洲股市,現時港股喘定已是萬幸,散戶暫時都不奢望今年首季恆指可以收復失地。更要命係重量級淡友拋出的警告一次比一次誇張,連商品大王都預警或會出現他有生之年未曾見過的最強跌市。股市吹淡風,即使未震散樓市,樓市要保持升勢亦有一定難度,一手市場氣氛亦會大打折扣,在此情況下,發展商要催谷買氣,最好使好用招數係揀十個八個單位出來打包成為首置計劃,吸引首置客入飛。

由於市場上仍存著一批供得起樓、對住屋有一定要求但又儲唔足首期的上車客,一手盤的首置計劃,正正解決他們上車難問題。再加上有回饋社會光環,新盤形象亦可以加分。更重要的是,新盤總有一些「豬頭骨」單位,如低層向嘈吵大街單位,又或西斜兼無景觀單位,這些較容易成為貨尾的單位,便可以撥入首置計劃之中,增加一炮清貨的勝算。

一旦首置計劃成為發展商推盤指定動作,最受衝擊將是二手盤業主,特別是心雄以高於市價放盤的業主,將難逃被買家殺價的命運。此外今年推出的新一批白居二名額,亦可能會受一手盤首置計劃影響,搶手度被溝淡。不過即使首置計劃成為新盤「例菜」,上車客仍要冷靜計數,以天生樓為例,首置盤入場費587.8萬元,以屯門樓來說都唔算平,計錯數要撻訂跳船,就可能較買錯牛證散戶更悲壯了。

【相關搜尋】儲首期上車4大禁忌

===============

財經精選資訊網站「中環街市」  臉書粉絲頁