香港滙豐總行難逃一賣?
滙控業績遜預期兼宣布暫停回購股份,重組開支又高達72億美元,加上疫情衝擊全球,今年業績睇怕只會更難睇。想谷靚盤數,除了裁員就係賣產,咁滙控會否打中環總行主意?
大企業賣產考慮因素離不開原則及價錢,滙控雖然作風較保守,但賣總行其實有前科。2009年滙控連橫出售紐約、英國及法國總部物業,合共套現約167億港元,之後滙控就由業主改做租客,向新業主租用總部物業。既然各地總部都賣得,當真正缺水逆境殺到,滙控只要保住大廈個朵及租用權,把中環總行出售並不出奇。
其次係價錢,年前和記大廈落實重建時,市場料重建後物業身價接近500億元。位置更優越且擁有香港地標光環及最穩定租客的中環滙豐總行,假如在疫情減退後放聲氣出售,身價有機會迫近千億,有了這筆特殊收入沖喜一下,加上派息不變,滙控股價亦可望不會跌得太甘。
講完賣家就順勢講下買家,過去有這類罕貴物業出售,通常都會吸引到內地財團出手。不過現在內房個個月忙於撲水,出手機會應該唔大,較有機會競購係滙控大股東之一平保。餘下的熱門之選估計有二,一是與滙豐關係友好的長和系,長實舊總部華人行正是與滙豐合作發展,現時小超人仍擔任香港滙豐董事會成員,由長和出手收購,既可以擴張長實商廈版圖,滙豐亦可以安心改任租客。
二係中東財團,原來幾年前滙控倫敦總部又易手到卡塔爾投資局手上,滙控選擇把中環滙豐總行同樣售予卡塔爾投資局牽頭中東財團,亦切合滙控積極進軍中東市場的戰略目標。
假如中環滙豐總行易手,滙控仲會唔會用盡整棟物業?既然滙控臨時CEO講明未來三年全球裁減3.5萬人手,香港滙豐似乎難以避免波及,加上減輕租金開支誘因,中環滙豐總行可能只租上半棟及樓下幾層。當銀行服務日漸虛擬化,地標式總行可能已經不合時宜,只用半棟,更可以溝淡風水佬再翻炒中環總行風水話題呢。
===============
精選資訊網站「中環街市」 臉書粉絲頁