驗樓直擊:鑽嶺交樓僅56分 詹sir:唔收貨
遠東發展(035)旗下黃大仙鑽嶺,實用不足200方呎的劏房戶業主收樓時覺得順眼、無問題,感覺85分,但資深驗樓師詹濟南「詹sir」發現交樓工種錯漏百出,狠批油漆差、廚廁都有漏水、地板鬆又凹,詹sir貼滿執漏黃紙,只給予56分,與業主預期大相逕庭,詹sir更直言:「唔收貨!」
漏水兼地板鬆
詹sir驗收鑽嶺高層劏房戶,實用198方呎,業主3年前以約360萬元買入。入屋即見廁所與客廳牆身傾斜,工作平台牆身亦出現輕微傾斜。露台趟門鎖鉸裝嵌差,外牆發現兩塊空心磚外,大廈外牆更甩紙皮石,露台簷篷甚至滴水,令詹sir中頭獎。
單位油漆一撻撻,凹凸不平。幾十呎客廳有多塊地板鬆,地板面有多處凹陷,詹sir在凹陷位貼黃紙越貼越多,超過10處。廁所淋浴間水龍頭雖無開,但地下濕,現場可見水掣駁位仍滴水,詹sir相信是未扭實。更馬虎的是,開放式廚房鋅盆去水窿被倒水泥,封了部份去水窿,水塞怎也塞不進。驗到最後見洗衣機去水喉漏水,詹sir嘆:「又中,不過來去水都扣到0分啦,多個唔多,少個唔少。」
全屋14項工種捧3隻蛋,包括鋪磚、來去水及潔具、地板,油漆亦重災扣剩2分,總分56分,他總結:「唔收貨!」遠東發展發言人回應,有關單位內發現的執修事項,承建商已即時作出跟進,並預計於14日內完成執修。