【鬼節炒人】同事追住主管撒溪錢 叫「一路好走」

鬼節遇上經濟唔好，老闆叫大家「共渡時艱」兼勒緊褲頭，同時又要各部門交人頭。幾經辛苦諗到cut邊個，小編聽到有機構HR竟然同部門建議lunch炒人，一來覺得同事放晒lunch，唔會有尷尬場面，二來亦避開放工前先炒人，等主管唔怕冇得放工，點知情況都係事與願違。

HR屎橋：趁lunch炒人

就係lunch前，主管已經叫被炒嘅同事留低開會，其他同事照放食飯。到派信一刻，被炒同事都好冷靜，主管同HR都以為自己做咗明智決擇，點知一到放工就知瀨嘢。

有被炒同事在大門口等主管放工，主管見到被炒同事仲喺門口等緊自己，已經大嚇一跳，估唔到同事仲係袋入面拎出大堆奚錢，一邊撒，一邊吊住主管尾，大叫「一路好走」，兼爆晒粗，仲足足追咗佢幾個街口，直至主管搵到的士上車，被炒同事先肯罷休。

原來被炒同事利用lunch後時間，走咗去買奚錢，一早諗到復仇大計。HR同主管千想萬想、千算萬算都想唔到出現呢一幕。最慘係撞正放工時間，好多部門嘅同事都目擊呢個場面，搞到仲尷尬。

聽講因為係鬼節，嗰位主管真係驚。

呢件好事最後當然傳千里，大家當鬼故咁聽添。鬼節炒人，大吉利是咩！

===================

19網輕鬆爆料熱線，歡迎舉報老細同事19惡行，立即click入去講畀我哋知啦