【魚樂無窮】低估值是買入原因 不是見底理由(唐牛)
昨日收到記者朋友來電,問到港股已跌至近市賬率一倍,與以往股災時低位相差不遠,是否差不多見底。好多人都抱着同樣心態,以不同的估值方式,如市盈率、市賬率,嘗試量度今次跌市的底部,但似乎大家都搞錯了。冇錯,相對圖表分析,用估值計數較為科學化,但要留意,2008年金融海嘯與現時的恒指成份股大不同,並非apple to apple,硬要比較有欠公允。
拆倉沽盤無眼 要錢唔要貨
更重要的是,今次跌浪並非因為睇淡企業盈利前景引發,而是因為環球金融市場拆倉潮,包括股市、債市、商品及滙市,目標只得一個,就是要錢唔要貨,電光火石之間,還會跟你談估值嗎?沽盤無眼,所以今次估值低至拍得住金融海嘯,也不是見底的理由,相反,閣下覺得股票平通街所以入場,卻是合情合理。
現在是否瞓身all in好時機?相信股神都答唔到你。重申一次,現階段入場要先問自己幾條問題︰1.有心理準備大市繼續再向下跌嗎?2.有足夠銀彈坐貨,而非用孖展嗎?3.沒有諗住搵快錢,目標真的是建倉嗎?4.知道應該揀邊隻股去買,唔好揀錯爛橙嗎?如果幾條問題答案都係yes,隨時可以撳掣,但都要同你講句,記住量力而為。
唐牛
本欄逢周五刊出