【魚樂無窮】港美股市的平行時空（唐牛）

美股周三晚大跌，但港股翌日表現硬淨，仿如平行時空。

歐美肺炎單日確診人數逼新高，其中德國更要再度封城，拖累股市急挫，周三晚美股三大指數全線跌逾3%，最令我擔心的是恐慌指數竟然突破40，為4個多月新高，是故周三盤前立即買入SQQQ（納指反向三倍工具），為持股對沖，倉位力保不失之餘，埋單更有微利。

電盈博有大動作跟尾

鏡頭一轉嚟到香港，一心諗住執平貨，但心水股如ATM及比亞迪（1211）僅低開2%至3%，與目標半成有差距，所以未有出手。但市場資金比我進取得多，三扒兩撥掃入熱門股份，股價亦隨即倒升，最誇張的當然係美團（3690）及比亞迪（1211），逆市大成交破頂，騰訊（700）埋單亦倒升，相反阿里巴巴（9988）未能轉燈。點解會有咁嘅情況？大家想想美團/比亞迪/騰訊與阿里巴巴的分別，便會知道答案，諗唔到嘅可在星期日炒牛通節目問我吧。

外電午後傳出，電訊盈科（008）計劃將OTT影視娛樂及音樂串流業務分拆於美國上市，預計集資額約2億美元。眾所周知，電盈今年動作多多，包括將nowTV業務售予旗下香港電訊（6823）、將所持盈大地產（432）股份以實物形式分派，解決了多年的CB死結，以及主要股東李澤楷透過回購股份增持，種種迹象顯示，8號仔嚟緊會有大動作跟尾，有耐性的戰友，不妨小注入場等運到。

唐牛

fb︰www.fb.com/tongcow88

YouTube︰https://www.youtube.com/channel/UCLwEpfQ6w1d-MUVlAS86QcQ?view_as=subscriber

本欄逢周五刊出