【魚樂無窮】港股通新貴逐隻捉(唐牛)
人仔轉弱,拖累恒指一度挫逾200點,但20天線見支持,埋單僅跌46點。一如在直播節目所講,指數在27000至28000點上落,暫乏方向,又係個股落鑊之時。以昨日為例,升幅冇兩成的公司,都未夠資格打入十大升幅榜,仲要係價量齊升?友欄推介的北控城市資源(3718)搶高兩成,成交額接近1億銀,絕對唔係講玩,反映市場資金極餓,四處覓食。
吼實首國維達中手遊
恒指今日(21日)公佈季檢結果,由於同股不同權是否納入恒指的諮詢期至3月中,所以成份股應該唔會有驚嚇的異動,相反,港股通潛在新貴再次成為市場焦點。天風證券發表研究報告,提出18隻個股有機會升呢。當中有兩隻持有,包括主打停車場業務的首長國際(697),以及紙巾股維達(3331),前者最近有新創建(659)入股,連同之前的京東,股東基礎更見星光熠熠。維達炒完紙巾概念未見大散,皆因業績交到數,最新全年盈利增長75%,整固後有力再破頂。假若有幸能夠打入港股通,股價必定錦上添花。
另一隻吸引我眼球的乃中手遊(302),近日乘着疫情大炒,走勢拾級而上,兼且企穩招股價2.85元,如果真的打入港股通名單,目標直指3.8元,潛在升幅15%,有興趣的戰友,記住芒實新聞。
唐牛
本欄逢周五刊出