香港股市 將收市,收市時間: 2 小時 31 分鐘

一齊睇吓1097份賣盤announcement

有線賣盤神乎奇技,複雜程度,拍得住去區分純官同雞扒妹(都叫鄭家純);有見及此,本網獲授權刊登以下文章,為大家一字不漏拆解呢單神刁⋯

(文章授權自不負責任金融研究中心)

文:梧杞杬

先旨聲明:

1)在下雖然有CPA及audit底不過唔係corporate finance expert,在下係純粹讀俾大家聽份announcement寫咗啲乜,因為在下相信好多人根本唔會睇又或者唔識字。完整嗰份announcement喺呢度:http://www.hkexnews.hk/…/listconews/sehk/2017/0420/LTN20170…

2)在下成晚喺唔同地方同唔同嘅人去鳩up呢單嘢,因為係一路睇一路諗一路寫一路up所以在下喺外頭寫嘅嘢一定會亂一定有唔啱,喺度講聲對唔住自己掌咗自己嘴巴先。

而家將喺外面討論咗嘅嘢,糾正咗啲錯處(21號中午再因應朋友糾正再改)之後再化成呢一篇鳩up總結。

好,開波。

賴叔之前share嗰段生果日報強調咗幾樣嘢:

1)3供5,折讓66%;

2)股東係傻佬純為首嘅一堆人,包括邱達昌趙令歡同李思廉;

3)九倉會將手上嘅股份實物分派(即係當錢咁)派俾股東;

4)九倉借俾有線嗰4億窿有3億會債轉股。

當然啦,其實份announcement複雜好撚多,在下講完之後你會發現其實3供5已經係最簡單嗰部份。

1)首先,啲乜春供股呀,實物分派(英文係distribution in specie)呀,等等等等係要開EGM通過,而且大股東同成單刁嘅相關人士無得投票。有線係4月18號停牌(收市價$0.61),20號夜晚10點出通告。好啦,而家EGM係5月29號(5個禮拜後)開,咁呢5個禮拜好明顯有線個股價就凍過水啦,個折讓咁撚大;

2)EGM要過嘅係供股,申請清洗豁免(apply whitewash waiver),債轉股,同埋一大抽其他嘢。咁正常啦,IFA會出份垃圾嘢話俾啲小股東聽點解呢單刁係好嘢blah blah blah,不過在下最在意嘅反而係提議將一手股數由1000變10000呢樣嘢(留返後面講);

3)清洗豁免(whitewash waiver),簡單嚟講就係小股東同意向SFC申請批呢個waiver俾個underwriter(承包商,即係永升亞洲)收股票嘅時候唔洗做GO(General Offer,即係公開收購,正常收咗30%嘅股票就要做GO架啦),如果無呢個waiver嘅話班大鱷就要做GO,咁好明顯就會俾人夾高個估價咁囉。

大家無聊可以睇吓SFC個Takeovers Code:http://www.sfc.hk/…/Takeove…/TO%20Code_2014%20Mar_Eng_TR.pdf

4)好啦,咁你覺得開EGM會唔會approve?點樣去令到佢approve?好容易啫,質到你隻嘢殘一殘,搵友好broker收貨,再搵人投票咪得囉(way of poll係計股權份數,by the way大家記唔記得曾經有一單奇刁係用show of hands數人頭然後衰咗?);

5)好,EGM過咗之後,下個關鍵日子就係7月31號,當fulfill咗一大堆前提之後就可以開始數日子。不過,因為今次係open offer(公開發售式供股)而唔係平時見開嘅rights issue,所以如果小股東唔供嘅話係唔會有供股權俾你抄,相反,你唔供個underwriter就會供埋你嗰份,小股東係會堅抽被攤薄。然後,8月18號就正式落簿登記做股東,21號就係將一手股數由1000股變10000股。供股嘅話9月4號前就要磅水;

其實以上嘅嘢一啲都唔複雜,覆雜嗰啲係黎緊嘅嘢。

6)喺8月18號正式落簿登記之後,九倉就會將佢手上嘅所有有線股票(總共14.8億股)派嗮俾佢嘅股東(包豁會德豐),因為呢啲股票係登記咗先掟所以就算揸住呢啲股票都無得供股。除咗會德豐手上將會收到嘅嗰9.15億股有線股票之外,其餘嗰啲當派嗮出街。咁你諗吓,呢啲有線股票咪就係當派紅股咁派返俾股東囉,屌跌到咁撚殘,又無撚得供股,好啦,呢啲出咗街嘅股票,如果你係九倉股東會唔會keep?諗吓,唔洗錢攞呢啲股票返嚟,又唔撚洗你供股,又叫做可以賺返幾毫子,在下好有理由相信其實有唔少九倉小股東會掟。當然啦,出面亦要做嘢舞高弄低吓個股價嚟收貨啦(你都唔好話,條街嗰度都忽然間多咗成5.69億股);

7)跟住,會德豐會透過公開市場或者非公開形式掟鳩埋手上嗰9億幾股俾大股東同埋掟出街。而同時間,而家有兩路人馬出現咗,第一係大股東HSBC Trustee(呢個係好明顯係吳家家族信託基金嘅嘅Trustee),第二個係吳光正夫婦,因為佢地接咗會德豐掉出嚟嘅有線股票。係咪好撚鬼馬呢!吳光正無啦啦唔洗錢咁就揸住咗成117球有線!

8)玩撚到呢度,而家先叫正式供股。其實點解要做上面嗰啲咁撚麻煩嘅嘢呢,原因係因為九倉同會德豐唔肯派cash,同埋要keep住個街貨量喎,所以九倉同會德豐係要不停咁掟貨掟到街貨量夠為止;

9)第四步就係九倉將4億債當中嘅3億轉股,轉股價$0.3563。因為九倉嘅債總共可以轉到8.4億股,所以又唔可以一次過轉嗮啦,如果唔係九倉同會德豐又要掟過嗮啲股票出街去維持返個街貨量。呢個就到時睇情況而掟啦。而啲報紙怒抄嗰啲%係點嚟嘅呢,就係假設供股嘅股票全部都由underwriter食嗮,然後九倉再債轉股之後得嚟嘅股權分佈咁解(即係話九倉要掟最多數目嘅股票出街)。

有咩implication?在下剩係話俾大家兩個數就得:街貨數目(唔係%)將會由成單嘢開波之前嘅5.24億股,變到成單嘢完成之後嘅16億股(總股數由20億增至58億股)。所以如果老散真係唔供股嘅話,實際上攤薄咗幾多其實唔洗計數都可以想像得出嚟。

不過,其實仲未完架--記唔記得一手股數由1000股變10000股呀?即係咁,3供5,你手上有3手,3千股供到變8千股,然後忽然間你由3手變8手再變做0.8手呀仆街冚家鏟!變撚咗碎股。咁你乘10啦,30手變80手然後變8手咪冇碎股囉。即係話,想唔要碎股,你要揸30000股有線,供到佢變80000股先叫揸到8手。

有朋友指出,其實今次供股有特別條款:如果你揸住有線啲股票登記嘅時候要供碎股嘅話,你係唔會有得供嗰啲碎股,個underwriter會供埋你啲碎股。即係話如果你原本揸一手(1000)股嘅話,3供5正常嚟講你會供1666股,不過而家呢,666股你唔洗供啦,underwriter幫你供埋。咁你end up得2000股即係0.2手,又變撚埋碎股。

在下認為成單刁最賤格嘅地方係九倉唔肯派special dividend而要做實物分派,維持街貨數量,同債轉股。維乜撚嘢持街貨數量吖屌你?收錢就收錢啦!所以班仆街先要不斷咁掟鳩嗮手上嘅有線股票出街,大佬佢唔係掟一手兩手喎,係千鳩幾球咁掟出街呀,你有線隻嘢個股價點可以唔殘?邊個接?咩價接?屌你老味心照啦!呢單邊鳩度係賣盤啫?根本就係賣殼啦。

嗱,在下純粹讀報咁讀架咋,希望有高手可以過嚟指點吓出面啲迷途羔羊就好,因為好明顯成單刁係engineered by高手,老散們就算無貨喺手都真係唔好亂咁走埋去供股呀(利申:無有線股票)

原文連結:不負責任金融研究中心

[caption id="attachment_18438" align="aligncenter" width="300"] 呢兩日除咗有線賣盤,將來純官會唔會搵同名嘅雞扒妹(圖)返有線做節目,都係財金最熱話題。[/caption]

===============

財經精選資訊網站「中環街市」  臉書粉絲頁